سيرة سيدنا النبى صلى الله عليه وسلم (الحلقة 53)

الحلقة ( 53 )
يلا صلوا على النبى :)
نقض القبائل للعهود مع رسول الله و غزو المدينه

خلصنا مع بعض احداث غزوه احد إمبارح ..دلوقتي احنا سنه اربعه هجريا،،السنه دي كلها احداث نتيجه اللى حصل فى غزوه احد من عدم تحقيق المسلمين لإنتصارات كبيره فيها،،إيه اللى حصل بعد غزوه احد؟ كل القبائل المحيطه بالمدينه نقضت عهودها مع الرسول عليه الصلاه والسلام ،،العهود دي كان الرسول واخدها معاهم بعد غزوه بدر بتنص على ان رسول الله لا يحاربهم ولا يحاربوه،،

بس بعد أحد و بعد  ماحققت قريش خساير فى جيش المسلمين ،قالوا أن جيش محمد مش قوي ولا حاجه و قرروا ينقضوا العهود  ..حتبدأ القبائل تعمل محاولتين لغزو المدينه ... أول محاوله لغزو المدينه كانت من قبيله بني اسد بقياده طلحه بن خويلد الاسدي (حيسلم بعد كده) ..المهم الرسول حيعرف من المخابرات أن جيش بقياده طلحه حيهجم على المدينه ،طيب حتعمل ايه يا رسول الله؟ دلوقتى جيش المسلمين منهك و تعبان، كمان لو النبى خرج بالجيش بره حيبقى وضع المدينه فى خطر فالوضع صعب جدا،،فحيأمر رسول الله بخروج جيش بقياده ابو سلمه ( فاكرينه ؟ ده أول مهاجر لله و رسوله من مكه للمدينه .. و زوجته أم سلمه )

المهم خرج جيش المسلمين،،و طلحه اتخض لما وصلت له الاخبار دى لأنه لاقي ان الموضوع بقى جد،، دا محمد باعت جيش ، فخاف طلحه و خد جيشه و انسحب ،، اصل طلحه كان متجرأ لأنه معتمد على فكره ان المسلمين تعبانين فأكيد مش هيطلعوا يحاربوه،، و حيهجم على المدينه على غفله و يهزم المسلمين و ينتصر و خلاص،، لكن اتفاجئ طلحه بخروج المسلمين بجيش.. و انسحب طلحه و بكده فشلت اول محاوله لغزو المدينه، و حيرجع جيش المسلمين بقياده ابو سلمه للمدينه، بس أبو سلمه كان عنده إصابه فى غزوه احد و مستريحش، فالجرح يأثر فى أبو سلمه جامد و يموت رضى الله عنه و أرضاه..

طيب تاني محاوله لغزو المدينه بقياده خالد بن سفيان الهذيلي ده من قبيله أسمها هذيل .. خرج خالد ومعاه جيش كبير اكبر من جيش بني اسد،، و أتجه للمدينه،، و عسكر فى منطقه قريبه من  المدينه و طبعا دي كارثه!!.. وصلت للنبى الاخبار و جيش المسلمين تعبان فمكنش فى حل غير ان المعركه تخلص من قبل ما تبدأ ..يعنى لا المسلمين يخرجوا يحاربوا .. ولا الجيش  اللى مع خالد يهجم على المدينه،،طيب ازاي ده حيحصل؟حيستدعي النبي صحابي اسمه عبدالله بن انيس .. ده كان عنده عشرين سنه،،فيقول له: لبيك يا رسول الله،،فيبدأ النبي يحكي لعبدالله على الوضع ان خالد بن سفيان يريد قتلي و غزو المدينه وقتل المسلمين ،، و المسلمين تعبانين،

و بعدين بدأ النبى يقول لعبد الله بن أنيس : اخرج واذهب إلي المعسكر واقتل خالد بن سفيان و أرجع إلينا ،، فقال : يا رسول الله !!!، فقال النبى: اذهب يا عبد الله..فعبد الله مخضوض فقال يارسول الله كيف اعرفه!! ( يعنى دى مشكله عبد الله !!انه بس مش عارف شكله !! طب مفكرتش ازاى حتعمل ده اصلا!! طبعا ده عشان حبه للدين و ثقته فى النبي) فيرد النبي عليه و يقول له : إذا رأيته وجدت لبدنك قشعريره وتذكرت الشيطان..و بعدين خرج عبد الله و قال : أنا مكنش قدامى غير انى انفذ و اطيع امر رسول الله..

فبيقول عبد الله : فأخذت سيفى و خرجت و لبست لبس الحرب و الحديد على وجهى و اقتربت فوجدت جيش كبير ،،فقلت الحرب خدعه (حقدر أكذب) ،فدخل بينهم فقالوا من انت؟ قال رجل يحمل من الكره لمحمد اكثر منكم..فطبعا رحبوا بيه ودخلوه ،،و فضل يبص و يدور على خالد بن سفيان فبيقول عبد الله بن انيس : فسقطت عيني على رجل فأقشعر بدني وتذكرت الشيطان فقلت صدقت يا رسول الله ،،صلي الله على محمد..

طيب عبدالله لاقى خالد..و خلاص حيبدأ يروح يقتله .. بس جه وقت صلاه العصر .. طيب حتصلي يا عبد الله؟ اه ..لان عبد الله خاف يوصل لخالد و يشك فيه و يتقتل عبدالله وهوه عليه فرض :) .. و فعلا يا جماعه حيصلى عبدالله .. رغم كل المخاطر اللي حواليه و رغم المهمه الكبيره اللي رايح يعملها فى سبيل الله والاسلام.. حيصلى عبد الله.. رغم ان ممكن يبقى حد ده فى بيته ومش بيصلي و ناس تانيه شغلها بياخدها من صلاتها ) ،طيب حيصلي ازاي عبد الله؟

 بيقول عبد الله : أخذت أومأ براسي و انا امشى .. طبعا ده ذكاء و فقه من عبد الله يعنى مش ينفع يصلي بصوت عالي والله اكبر و يلا.. لا طبعا ..المسلم فطن و بيفكر،، ‘لاقى حل عشان يصلي ويكمل مهمته و مقلش مش حصلى ^_^ .المهم وصل عبد الله  لخالد فقال خالد من الرجل؟ فقال عبد الله : رجل يحمل من الكره لمحمد اكثر منك،وسمعت بجمعك هذا و جيشك هذا ،فجأت أفعل كما تفعل،،فقال خالد: اجل.. و بيحكى عبد الله و يقول : فظللت اتودد اليه حتي جعلني حارسه الخاص ( بيخطط ويفكر و اكيد اخد مده عشان يوصل لكده) المهم فى ليله دخل عبد الله بن انيس بعد ما خلاص بقى حارس من حراس خالد ..

 فدخل لخيمه خالد و قتله فصرخت النساء فأنطلق عبدالله من الخيمه يجري و أتجمع ناس من  الجيش عشان ييجروا وراه ،، فشاف عبد الله كهف فأستخبى فيه تلات ايام ، فبيقول : كنت لا اجد الا ورق الشجر آكله،،حتي تشتت الجيش و عدت إلى المدينه .. عبد الله راجع بسرعه يبشر النبى .. طيب دلوقتى النبي فين..قاعد ونايم ومرتاح؟ لا ..حبيبي رسول الله ،كان واقف على باب المدينه قلقان مش بينام لحد ما شاف عبد الله داخل المدينه من بعيد فقال له: اافلح الوجهه؟ فرد عبد الله و قال : فعلتها يا رسول الله، فقال النبي الله اكبر.. الله اكبر فراح النبي واحتضنه،،وقال له تعال يا عبد الله أكافئك..

تخيلي النبي يجي يقولك تعالي اكافئك.. تخيلى  اخلاقك،، صبرك ،،حجابك،،التزامك و على اي موقف عملته ونيتك كانت خالصه لوجهه الله ..فيجي رب العالمين ويكافئك عليه ♡.. المهم ففرح عبد الله و راح مع النبي لحد بيته ،فالنبي قال له: انتظر .. و دخل النبي بيته،،وعبد الله كان متشوق بهديه النبي،،فخرج النبي من بيته واعطي لعبد الله "عصا "فبص له عبد الله.. فالنبي قال له: خذها يا عبدالله فأخدها وقال: اجل..( بكل ادب عبد الله بيتصرف مع رسول الله،، أخد عبد الله العصايه و مسألش إيه ده ) المهم فضل يقلب فيها يمين وشمال ،جايز فيها قوه خارقه او اى ميزه بس طلعت مش بتعمل اي حاجه! .. فالصحابه قابلوه و سألوه : ماذا اعطاك رسول الله ؟ فقال :هذه العصا،، فقالوا له: وما تفعل!! عد الي رسول الله فأساله،..فقال :ما كنت لأفعل هذا،،بس ضغطوا عليه انه يروح للنبي عليه الصلاه والسلام و يسأله..

 فراح وقال يا رسول الله ما تفعل هذه العصا؟ فقال النبي : يا عبدالله خذ هذه العصا علامه بيني وبينك يوم القيامه ،،فإذا رايتك عرفتك وادخلتك بها الجنه.فقال عبد الله : فكانت احب شئ إليا ♡..فكنت اذا نمت اخذتها بجانبي واذا قاتلت كانت معي وامرت ان تدفن معي،حتي اذا انشق عني القبر ابحث عن رسول الله واقول انا عبد الله بن انيس وهذه العصا التى اعطيتنى إياها. وادخل الجنه ♡..

شايفين ازاى النبى ربط و علق قلب عبد الله بالجنه،،اي حد عاوز يعيش مرتاح يعلق قلبه بالجنه،،كل حاجه ف الدنيا فيها تعب و محتاجه جهاد .. قال تعالى :" لَقَدْ خَلَقْنَا الْإِنسَانَ فِي كَبَدٍ" يعنى الدنيا كلها تحديات و راحتك الحقيقه فى الاخره فى الجنه،،فاللي نفسه فى حاجه و مخدهاش ..ميزعلش.. حياخدها فى االاخره،،واللي اتظلم فى الدنيا حقه حياخده،،والفقير هيبقي غني فى الجنه،، و فى الجنه لقاء الموتي الاحباب اللي فرقونا..

ومره أتسأل الامام احمد بن حنبل و أتقال له: متي الراحه؟ قال مع اول قدم نضعها فى الجنه.. و عمر بن عبد العزيز قال: ايها الناس انكم لم تخلقوا لهذه الدنيا،،انما خلقتم للخلود♡.. عيش الدنيا و افرح و اسعى و اعرف ان رزقك فى مصلحتك مهما كان كتير / قليل ..ربنا خير الرازقين هوه الحكيم العليم باللى ينفعك و اللى يضرك.. اربط قلبك بالجنه وكل حاجه حتتعوض بإذن الله..

يوم القيامه سيدنا محمد حيبقى واقف على الحوض و معاه عصا يوم القيامه ،طب ليه يا سيدنا النبي؟ قال: اذب بها الامم عن الحوض حتي تأتوا أنتم أولا فتشربون فإذا شربتم فارتويتم.. سمحت لباقي الامم ان يشربوا.. تخيلوا!!  كل الامم عاوزه تشرب من حوض سيدنا محمد،، بس النبى عايز يشربنا احنا الاول .. امته .. حتى فى الاخره همك هوه احنا يا رسول الله و شاغل نفسك بينا ومش حترتاح غير لما امتك تشرب وترتوي..طيب شكل اللى حتشربه من حوض النبي ايه؟ ابيض من اللبن واحلي من العسل من شرب منه ..شرب شربه هنيئه لا يظما بعدها ابدا..

 و ربنا قال للنبى: إِنَّا أَعْطَيْنَاكَ الْكَوْثَرَ.  الكوثر ده حوض فى الجنه والنبي شافه فى الاسراء والمعراج ،، يعنى يوم القيامه النبى له حوضين؟ لأ.. حوض واحد، حوض الكوثر فى الجنه فى عليين و للحوض ميزابين يعنى فتحتين، الشراب بينزل منهم .. ميزاب من دهب و ميزاب من فضه .. و واحد منهم حينزل منه نهر هيتعمل مخصوص فى ارض المحشر يوم القيامه،،عشان نشرب منه فلما يخلص يوم القيامه حيترفع و يرجع فى الجنه .. فالصحابه كانوا متعلقين ومرتبطين بيوم القيامه،

مره سيدنا انس راح للنبي وقال : يا رسول الله يوم القيامه اين اتيك؟( ألاقيك فين يوم القيامه؟ شايفين ازاى واثق انه حيشوفه هناك.. شايفين اليقين و الإيمان بالله واليوم الاخر) فالنبى رد عليه و قال له: عند الصراط ، فقال أنس ارايت ان جئت ولم اجدك ؟ فقال النبى : أأتنى عند الميزان ،،قال ارايت ان جئت ولم اجدك؟ فقال النبي : أأتنى عند الحوض .. فأنا لا اغادر هذه الثلاث.. طيب فشلت محاولتين غزو المدينه، فحتلجأ القبائل لأعمال غير شريفه.. حيلجأوا للغدر ..طيب و يا ترى حينجحوا؟ للأسف اه .