سيرة سيدنا النبى صلى الله عليه وسلم(الحلقة 59)

الحلقة  ( 59 )
يلا صلوا على النبى
 ندخل على أحداث السنة الرابعة هجريا, منها زواج النبى من السيدة "زينب بنت خزيمة". السيدة "زينب" كانت متزوجة مرتين قبل النبى والاثنين ولاد عم النبى ..اتزوجت الطفيل بن الحارث بن عبد المطلب و بعد ما مات اتجوزت اخوه "عبيدة بن الحارث بن عبد المطلب", الصحابى دة احنا حكينا عنه فى غزوة بدر،

 فاكرين لما وقف تلاته من الكفار فى تحدى و قالوا : " من للمبارزه" و كان منهم  "شيبة بن ربيعة"، و النبى يطلع 3 من المهاجرين وهم: "حمزة بن عبد المطلب", "على بن أبى طالب" و " عبيدة بن الحارث بن عبد المطلب" بن عم رسول الله. وأثناء المبارزة, أصاب "شيبة" سيدنا "عبيدة" زوج زينب , ومسك "شيبه " سيفه و قطع رجل سيدنا عبيدة, وقعد ينزف دم كتير فحملوه الى النبى, فبكى النبى وقال: "لا تضعوه على الأرض, بل ضعوه فى حجرى" فالنبى مسك سيدنا  عبيدة ووضعه فى صدره, وسيدنا عبيدة يصرخ من الألم ..

 لكنه لما حس انه فى حضن النبى, فتح عينيه ونظر للنبى وقال: "يا رسول الله, أراض عنى؟" فيبكى النبى, ويضم سيدنا عبيدة ويقول: "اللهم انى أشهدك أنى راض عن عبيدة فأرض عنه" , ويفتح سيدنا عبيدة عينيه ويبتسم للنبى ثم يموت رضى الله عنه وأرضاه ... وبعد موته, تترمل السيدة زينب للمرة الثانية. والسيدة زينب تعبت نفسيا جدا بعد موت زوجها التانى,

وكانت امرأة عظيمة وكريمة جدا, وكانت تلقب ب "أم المساكين" من كتر ما بتتصدق على الفقراء و فعلها للخيرات. فيقرر النبى انه يرفع قدرها ويكافئها على صبرها, ويتزوجها. وكان عمرها 60 سنه لما تزوجها النبى, و مكانتش جميلة  وعاشت فى بيت النبى 8 شهور بس و ماتت .. تزوجها النبى اكراما لها عشان تبقى يوم القيامة من أمهات المؤمنين. يبقى الغرض من الزواج لم يكن لحب النبى فى الزواج, مين يتجوز سيدة عجوز من القواعد, شكلها مش حلو و عندها أولاد؟ لا يعقل أبدا أنه يكون زواج للمتعة ... حاشاه صلى الله عليه وسلم

 و تموت السيدة زينب, ويغسلها النبى ويكفنها بإيديه الشريفتين, ويحفر قبرها بنفسه, وينزل الى قبرها ويضطجع فيه حتى يكون سكينة لها و طمأنينة. وتكون أول امرأة تدفن فى البقيع... شايفين رقة النبى و حنيته الشديده عليها... عليه أفضل الصلاه والسلام. بعد وفاه السيدة "زينب" تزوج النبى من السيدة "أم سلمة".. ام سلمه دى اللى كانت من اوائل اللى هاجروا هيه و ابو سلمه زوجها و حصل مشكله..فاكرين؟؟ لما أهل ابو سلمه خدوا ابنها منها و ابو سلمه هاجر بعد ما اهلها صدوه انه ياخدها للمدينه و كانت مأساه كبيره..

المهم بعد كده حتقدر تهاجر لزوجها و حيحارب ابو سلمه فى غزوه احد و حيستشهد فى الغزوه و حتبقى ارمله..بس كان بينهم حب كله رحمه و  صدق.. السيدة أم سلمة ليها قصة جميلة جدا مع زوجها أبو سلمة. القصة هى: ان سيدنا أبو سلمة قبل ما يطلع غزوة أحد ويستشهد فيها, راح لأم سلمة يوصيها بوصايا فى حاله استشهاده فى الحرب, فالسيدة أم سلمة كانت بتحبه جدا,

 فبصت له و قالت: "يا أبا سلمة, انى علمت, أنه ما من امرأة, يموت زوجها ولا تتزوج غيره, إلا و كانت زوجته فى الجنة, فتعالى نتعاقد ان مت أنا, فلا تتزوج بعدى. وان مت أنت, فلا أتزوج بعدك" فيقول لها أبو سلمة: "لا يا أم سلمة, هل لك فى خير من ذلك؟ " فقالت: "وما هو؟ ", فرفع ابو سلمه يده إلى السماء وقال: "اللهم ان أنا مت, فلا تذر أم سلمة وحيدة بعدى, و أرزقها بعدى زوجا, لا يؤذيها ويحميها, ولا يحزنها", و فعلا استجاب رب العالمين.. مين الزوج الذى دعا به أبو سلمة؟  سيدنا محمد عليه الصلاة والسلام  خير البشر..

اصل بعد ما تترمل أم سلمة و هى كانت ست كبيره فى السن ساعتها كمان قام تزوجها النبى. طيب ليه اتجوزتها يا رسول الله؟ أصل "أم سلمة" من قبيلة اسمها "بنى مخزوم" من أعز قبائل  قريش, وكانت من أكتر القبائل شدة و عنف على المسلمين, وكانت صاحبة الانتصارات فى معظم الحروب.. فلما تزوج النبى أم سلمة, شعرت قبيلة بنى مخزوم بشىء من الألفة. و لاقوا أن النبى قد أكرم أم سلمة كرما شديدا وعاملها معاملة حسنة, فكانت النتيجة ان كل قبيلة بنى مخزوم أسلمت. و ده معناه ان نص قوة كفار قريش اتدمرت ، بسبب إسلام قبيله قويه زى دى..

طيب ممكن حد يسأل: "يعنى هو مكنش فى أى طريقة تانية لعمل الألفة بين المسلمين وقبيلة بنى مخزوم غير الزواج من ام سلمه؟ والجواب: "لا" مكنش فيه..طيب ليه ؟ لان أيام العرب, وسيلة الاتصال الاجتماعى كانت الزواج, ودى كانت الطريقة الوحيدة لقرب القبائل من بعضها لبعض. والموضوع دة كان عالمى فى الغرب كمان, مكنش عند العرب بس ... يبقى النبى بكدة أفاد الاسلام فائدة عظيمة جدا عليه أفضل الصلاة والسلام...

و السيدة أم سلمة لما زوجها  ابو سلمه مات, قالوا لها: "قولى انا لله وانا اليه راجعون. اللهم أجرنى فى مصيبتى واخلفنى خيرا منها" فقالت: " من خير من أبى سلمة؟" ... فكان الذى خيرا من أبى سلمة هو رسول الله ♡ وكل واحد يمر بلاء يقول الدعاء الجميل ده و يرضى بالله <3
 من أجمل أحداث السنة الرابعة من الهجرة ميلاد الحسنيين : الحسن والحسين "سيدا شباب أهل الجنة" وأحفاد النبى صلى الله عليه وسلم. والنبى كان فرحان بيهم جدا وكان أولاد فاطمه و على ♡  و كان النبى بيحبهم أوى لدرجة ان الناس كانوا بيقولوا عليهم "أبناء النبى" . وكان سيدنا أبو بكر بيمسك سيدنا الحسن, ويحضنه ويقبله و يقول له: "فداك أبى وأمى, شبيه النبى ولست شبيها لعلى" ..

و يوم ما جه خبر ولادة السيدة فاطمة للحسن, فيفرح النبى جدا و يجرى على بيت فاطمه , ويدخل فيحمل "الحسن" قبل ما يحمله ابوه سيدنا "على".. و يقول النبى لسيدنا على: "يا على, ما سميته؟", فيقول سيدنا على: "يا رسول الله, سميته حربآ..! أريد أن ينادونى بأبى حرب". فيقول النبى: "يا على, هلا سميته   حسن؟" فيوافق سيدنا على..

و بعد 9 أشهر يتولد سيدنا الحسين, و يفرح النبى جدا  ويجرى على بيت فاطمه و يدخل فيحمل "الحسين" و يقول سيدنا محمد لسيدنا على: "يا على, ما سميته؟", فيقول سيدنا على: "يا رسول الله, سميته حربا! أريد أن ينادونى بأبى حرب". فيقول النبى: "يا على, هلا سميته حسين؟" فيوافق سيدنا على. وبكده كان لقبهم بالحسنيين، أحفاد النبى ♡

 والنبى كان دايما بيحضنهم ويشمهم زى ما بتشم الأم أولادها (دى حاجه مش حيحسها غير الامهات ♡)، و كان النبى يقول: "اللهم انى أحبهما فأحبهما" ..و فى ولاده اطفال فاطمه عرفنا حاجتين من السنن و همه التحنيك والأذان.. النبى حنك الحسن والحسين وأذن فى أذنيهما.. التحنيك :يعنى تأخد تمرة, وتمسك لب التمرة الطرى و تضعه فى سقف فم الرضيع, فيبدأ الرضيع باستطعام التمرة ويكون أول ما يدخل فى جوف الرضيع هو التمر. و ده له قيمه عظيمه لانها السنة و الولد بيبقى مبارك, يرضى بأقل شىء ويكون قنوعا ... التحنيك كان شرف للحسنين, لأن أول حاجه امتزجت بريقهم هو ريق النبى لأنه خلى لب التمره طرى اكتر بريقه ♡ صلى الله عليه و سلم قبل ما يحطها فى فم احفاده.. و سنه الأذان فى أذن الرضيع اليمنى, فيكون أول ما يطرق أذن الطفل كلمة: "الله أكبر"

و ندخل دلوقتى  على أهم أحداث بداية السنة الخامسة من الهجرة, وهى غزوة "بنى المصطلق", طيب ايه احداثها ؟  ان كان فى قبيلة اسمها "بنى المصطلق و كان قائدها "الحارث بن أبى درار", و الحارث جهز جيش لمحاربه المسلمين.. و المسلمين عرفوا بده وقبل ما يخرج النبى للقتال, بعت صحابى اسمه "بريدة الأسلمى" عشان يتأكد من خروج بنى المصطلق, وفعلا أتأكد بريده و اخبر النبى بده..  فجهز النبى عليه الصلاه و السلام جيش لرد العدوان  من 700 مقاتل و خرج و اعتمد على عنصر السرعة والمفآجأة وعسكر أولآ .. و الجيشين حاربوا بعض وانتهى القتال بإنتصار النبى والمسلمين.

وقام المسلمون بأسر 100 من قبيلة بنى المصطلق, وكان من بين الأسرى "جويرية بنت الحارث بن أبى درار" بنت قائد الجيش..وعادة فى الحرب  الأسرى كانوا بيتقسموا على جنود المعركة, عشان نعمل تبادل أسرى, أو ان الأسير يدفع مبلغ من المال مقابل حريته, عشان القبائل تفكر ميت ألف مرة قبل ما تحارب النبى مرة تانيه، لان الفلوس بتوجع ومش من السهل ان أى حد يدفع فلوس, وكان النبى بيوصلهم فى النهاية للسلام و يفهمهم ان الحرب و العدوان مش هو الحل..

جويرية أتأسرت ويطلع نصيبها مع صحابى اسمه " ثابت بن قيس بن شماس"وسيدنا ثابت ده كان له قصة جميلة أوى. سيدنا ثابت بطبعه صوته عالى. ففى مرة, كان قاعد مع النبى فى المسجد النبوى بيتكلم معاه, وهما قاعدين تنزل الآية: " يَا أَيُّهَا الَّذِينَ آمَنُوا لَا تَرْفَعُوا أَصْوَاتَكُمْ فَوْقَ صَوْتِ النَّبِيِّ وَلَا تَجْهَرُوا لَهُ بِالْقَوْلِ كَجَهْرِ بَعْضِكُمْ لِبَعْضٍ أَن تَحْبَطَ أَعْمَالُكُمْ وَأَنتُمْ لَا تَشْعُرُونَ" , ففزع سيدنا ثابت, وبكى و رجع لبيته  وحبس نفسه 3 أيام.

فالنبى افتقده وسأل عنه, فسيدنا "سعد بن عبادة" جار سيدنا ثابت راح عشان يطمن عليه. فخبط على بابه فسمع صوت شهيق وبكاء شديد, و فتح سيدنا ثابت الباب فلاقاه بيبكى و وشه اصفر ..فقال  سيدنا سعد: "ما لك يا ثابت ،رحمك الله؟" فقال سيدنا ثابت: "لا تكلمنى يا سعد, أنا من أهل النار!" فقال: "ولم؟" فقال سيدنا ثابت: نزلت فى الآية" لا ترفعوا أصواتكم فوق صوت النبى, وكنت أرفع صوتى فوق صوت النبى.. فلا تكلمنى انا من اهل  النار" .

 فراح سيدنا سعد و حكى للنبى كل اللى سمعه من سيدنا ثابت, فابتسم النبى وقال: "لا والله, ليس من أهل النار, بل هو من أهل الجنة" فالصحابه بيحكوا ويقولوا على سيدنا ثابت: "والله, كنا نراه يمشى بيننا, ونحن نعلم أنه من أهل الجنة".. طيب دلوقتى جويريه اتأسرت و بقت من نصيب ثابت بن قيس بن الشماس وكان ثابت قبيح الخلقة , فسيدنا ثابت قال لجويرية لو عايزة ترجعى  لقبيلتك لازم تدفعى فلوس الأول. و جويرية كانت متضايقة وعايزة تمشى، فقالت لسيدنا ثابت: "أكاتب نفسى. (يعنى أعطيك مبلغ وأرحل)" فقال لها: "أجل" .

بس جويرية مكنش معاها مبلغ يكفى, فقالت انها حتروح للنبى تستلف منه فلوس عشان تحرر نفسها. فالسيدة عائشة هى اللى حكت القصة دى, و قالت  "كنت جالسة, فإذا بجويرية بنت الحارث بن أبى درار قد أتت", وكانت جويريه جميلة حلوة مليحة. ما يراها أحد من الناس الا أخذ بنفسه (من شدة جمالها) فرأيتها تقف على باب النبى, فكرهتها"  وبالفعل دخلت  جويرية و كانت قد أسلمت

 و حكت للنبى كل اللى حصل  وانه وقع عليها بلاء الشديد لأنها بنت سيد القبيله ..و قالت انها جت عشان تستعين بالنبى على مكاتبتها من ثابت بن قيس بن شماس.و يديها المال او يشوف حل، فالنبى عليه الصلاة والسلام رد على  جويرية وقال لها: "يا جويرية, هلا أخبرك بخير من هذا؟" فقالت: "وما يا رسول الله؟", فقال لها: "أقضى كتابك أو أتزوجك" يعنى يا اما أديكى فلوسك وتروحى قبيلتك, يا اما أتزوجك وتحصلين على حريتك, فأختارت أن تتزوج النبى عليه الصلاة والسلام.

 و بالفعل تزوجها النبى و السيده جويريه بقت ام من امهات المؤمنين رضى الله عنها و أرضاها.. طيب ما هى فايده الزواج ده و ايه الهدف منه؟  انتشر بسرعه فى قبيله بنى المصطلق خبر زواج السيده جويريه و النبى و كمان المسلمين  عرفوا , فالصحابة اللى كان معاهم 100 أسير قالوا: هؤلاء الأسرى أصبحوا أصهار رسول الله, ارفعوا أيديكم عنهم", يعنى احنا أسرين دلوقتى أقارب النبى, مينفعش, أطلقوا ال100 أسير. وبالفعل أتحرر ال100 اسير.. فالأسرى تعجبوا من حب الصحابة الشديد للنبى فأسلموا كلهم ♡. وأسلم بعدهم كل قبيلة بنى المصطلق كلها ..و بتقول السيدة عائشة: "والله, ما علمت امرأة, أكثر بركة على قبيلتها من جويرية بنت الحارث" فقد أسلم على يديها كل قبيلتها ما عدا أبوها "الحارث بن أبى درار" .وبالتالى كان زواجا له هدف عظيم جدا ..

" الحارث بن أبى درار" سيد القبيله رجع قبيلته وفكر انه يفدى ابنته جويرية  فطلب صدقة وجمع مبلغا من المال ومجموعة من النوق و راح للنبى. و فى طريقه للمدينة أعجب بناقتين, فربطهم فى وادى و نوى على انه ياخدهم لنفسه. وبعد ما وصل للنبى دخل عليه وقال: "جئت أفدى جويرية" , فابتسم النبى وقال له: "يا حارث, وأين الناقتين اللذين خبأتهما فى الوادى؟" و وصف له النبى مكان الوادى و وصف الجملين, فقال الحارث: " أشهد أن لا اله الا الله, وأنك رسول الله. لم يكن معى الا الله ولم يرانى الا الله" .. يعنى كدة سيد القبيلة كمان أسلم ... شايفين زواج النبى من جويرية كان بهدف خير قد ايه