سيرة سيدنا النبى صلى الله عليه وسلم (الحلقة 58)

الحلقة ( 58 )
يلا صلوا على النبى :)
حندخل على أحداث السنة الرابعة من الهجرة, و حيحصل أحداث إجتماعيه و هيه  زواج رسول الله صلى الله عليه و سلم من السيده "زينب" و السيده "أم سلمة" و السيده "جويرية" رضى الله عنهم و أرضاهم ..بس قبل ما نحكى زواج النبى من 3 سيدات, لازم نقول الحكمة من تعدد الزوجات..ليه النبى عليه الصلاة والسلام تزوج أكثر من واحدة و جمع بينهم؟  النبى تزوج 11 إمرأه و جمع بين 9 زوجات، لأن 2 من 11 زوجه ماتوا قبل جمع النبى بباقى الزوجات..

أولآ : الرجل المسلم شرعآ مسموح له يتزوج أربع نساء فقط.. و زمان كان من العاده ان الرجال بيتزوجوا عدد كبير جدا من النساء ممكن يوصل لعشرين زوجة. وبالتالى كانت بتحصل مشاكل زى مشكله أختلاط الأنساب , فالإسلام حدد عدد معين للزوأج بأن الرجل يتزوج اربع نساء فقط.. و ده للحد من المشاكل دى و كمان ربنا خلى التعدد حل لمشاكل بظروف خاصه جدا و شروط صعبه لو اتوفرت ساعتها بتسمح للراجل انه يتزوج اكتر من واحده لحد 4 نساء فقط .. يعنى التعدد رخصة وليس سنة .. يعنى أيه؟

 يعنى التعدد مش سنه النبى عملها فأى حد يعملها من بعده. لأ..تعدد النبى بزواجه من 9 نساء كان حكم شرعى يخص النبى فقط وكمان كان لأسباب حنعرفها سوا.. إذن التعدد مش سنه... التعدد رخصه ربنا شرعها للمسلم  عشان تكون رخصه و حل بيبقى مسموح بيه فى وجود مشاكل و ظروف خاصه و تنفيذها له شروط و مش حندخل فيها دلوقتى.. وبيبقى مسموح له ان يتزوج لحد 4 نساء فقط..

طيب النبى عليه الصلاه و السلام له وضع خاص، النبى تزوج تسع نساء ..و قلنا قبل كده فى رد شبه زواجه من السيده عائشه فى سن مبكره أن النبى لا يستوى مع غيره من الرجال.. و ان النبى حياته كلها عبارة عن منهج, و تفسير عملى للقرآن الكريم محتجاه  البشريه كلها .. طيب احنا عندنا فى السنة حاجة اسمها "سنة قولية" وحاجة اسمها "سنة فعلية". السنة القولية هى الحاجات اللى النبى قالها, و السنه الفعلية هى الحاجات اللى النبى عملها. فالنبى وهو خارج بيته اللى بينقل  أقواله وأفعاله مين ؟ الصحابة. (المسلمين فى غزوة بدر كانوا 313, أما فى حجة الوداع قبل وفاه النبى المسلمين حيوصلوا ل 30,000 بنى آدم) يعنى بره البيت فى 30,000 بنى آدم بينقلوا سنة النبى و احاديث النبى, طيب ده بره البيت .. طب معقول ان زوجة واحدة فقط  داخل البيت تكفى لنقل سنة النبى و كل اقواله و افعاله اللى جوه بيته؟

 طبعا يستحيل, لأن كل كلمة النبى بيقولها وكل حركة بيعملها دى رسائل للأمة, فمفيش شخص يقدر لوحده يرصد كل أقوال وأفعال النبى, يعنى ممكن الزوجه تنسى حاجه أو فى حاجات النبى يعملها تفوتها و متشوفهاش .. فأكيد زوجة واحدة لا تكفى لنقل السنة النبوية للبشرية..و من الدلائل على ان زواجه من 9 نساء كان عشان رساله هو ان مفيش زوجة من زوجات النبى كانت بتخلف و خلف بس من السيده خديجه, طيب يعنى بقيت الزوجات كانوا كلهم عقيم؟ بالعكس, دول كانوا بيخلفوا عادى من أزواجهم اللى قبل النبى, طيب ايه الحكمة؟

الحكمة هى تفرغ الزوجات الكامل لنقل السنة عن الرسول عليه الصلاة والسلام,  فكل زوجاته مخلفوش منه ما عدا السيدة "ماريا القبطية", اللى تزوجها النبى قبل  وفاته بفتره.. طيب اشمعنا؟ عشان محدش يفتكر ان دة كان ضعف جسمانى عند النبى او كبر السن و انه خلف من  ستنا خديجه لمجرد انه كان لسه شاب.. بل بالعكس ، ماريه خلفت.. فده يدل ان النبى يقدر يخلف عادى جدا و كمان رغم سنه مكنش بيعجز حتى قلنا قبل كده ان النبى مات و عنده 17 شعره بيضه بس ..فعدم خلفه زوجاته كان لحكمه التفرغ الكامل لنشر السنه النبويه

طب عارفين الأحاديث اللى نقلتها أمهات المؤمنين عن النبى صلى الله عليه وسلم وعددهم أكثر من 3000 حديث .. كان أغلبهم فى الفقه, فقه الوضوء, الطهارة, الغسل, التيمم, الحيض, النفاس والجماع و غيرهم من الأمور الخاصة جدا بالنساء والتى لا يصلح للرجال الحديث عنها. مرة السيدة عائشة كانت قاعدة بتفتى فى الحيض وتتحدث نقلا عن النبى, فقالوا لها:" يا أم المؤمنين! الصحابى الفلانى أفتى بأمر آخر", فقالت: "وما يدريه هو؟" يعنى وهو هيفهم منين, أنا امرأة وأنا أدرى بالأمور دى..و كان معاها النبى و بتسأله و بيفهمها و يعلمها.

المهم نفهم من ده أن النبى كان محتاج نساء ينقلوا عنه السنة الداخلية... أحنا النهاردة بفضل ده عارفين النبى كان بيأكل ازاى, وبيشرب ازاى, بينام على أنهى جنب, بيغتسل ازاى, يعنى أدق تفاصيل حياته كانت كتاب مفتوح لينا منقول عن أمهات المؤمنين...و ده يدل ان التعدد ب9 زوجات كان لحكمه إلهيه و رساله كبيره بتحملها أمهات المؤمنين للبشريه ..

ثانيآ ، ربنا فى القرآن قال: "لَقَدْ كَانَ لَكُمْ فِي رَسُولِ اللَّهِ أُسْوَةٌ حَسَنَةٌ لِمَنْ كَانَ يَرْجُو اللَّهَ وَالْيَوْمَ الْآخِرَ وَذَكَرَ اللَّهَ كَثِيرًا" , فالنبى يتزوج المطلقة مثلا, طيب ليه يا رسول الله؟ عشان يقول للعالم قلدونى, يعنى ممكن تتزوجوا مطلقة, المطلقة دى مش المفروض انها تكون منبوذة فى المجتمع، بالعكس, دة النبى نفسه تزوج من مطلقة. و النهاردة أى امرأة مطلقة المفروض مش تتحرج أبدا, يكفيها ان واحده من امهات المؤمنين (زوجات الرسول) كانت مطلقه قبل زواجها من النبى.. شايفين قد ايه النبى رفع من قدر المطلقة و المرأة عموما فى المجتمع.

طيب مين من أمهات المؤمنين كانت مطلقة والنبى تزوجها؟ السيدة "زينب بنت جحش" اللى طلقها سيدنا "زيد بن حارثة" ...طيب النبى قدوه كمان بإنه تزوج النبى من الأرملة اللى مات زوجها, زى مين؟ السيدة "أم سلمة", فالمجتمع مينفعش يقلل من قدر الأرملة  لأن النبى رفع من شأنها بزواجه منها... طيب و  يتزوج النبى كمان من اليهودية بعد إسلامها.. زى مين؟ زى السيدة "جويرية" والسيدة "صفية بنت حيى بن أخطب" , عشان لما امرأة يهودية تدخل فى الاسلام, المجتمع لا يحقر من شأنها عشان من نسل يهودى..

و تزوج النبى كمان من واحده  أكبر منه فى السن ب 15 سنة, زى السيدة "خديجة بنت خويلد" ليرفع قدر المرأة الكبيرة فى السن و أن مفيش مشكله أنك تتزوج واحده اكبر منك مدام بتحبوا بعض و متفاهمين..و كمان تزوج النبى من اللى كانت مسيحية زى السيدة "ماريا القبطية".. طيب ربنا شاء ان النبى يعمل ده ليه ؟ عشان بكده حيبقى النبى  جمع كل طوائف النساء فى المجتمع ورفع من قدرهم, فبالتالى مش من حق أى بنى آدم انه يقلل من قدر المرأة بجميع طوائفها و جميع حالاتها الإجتماعيه .
طيب حنقول  حكمه كمان للتعدد و هى إثبات تمام الكمال للنبى صلى الله عليه وسلم..طب يعنى ايه ؟ اصل العلماء بيقولوا ان الزوجة لديها عين ناقدة, يعنى لو عايز تعرف حقيقه راجل أسأل زوجته هيه أكتر واحده عرفاه.. انت مثلا دلوقتى بتسأل عن راجل, فممكن الناس تقولك ده رجل صالح و يشكروا فيه, و تيجى تسأل بقى زوجته حتلاقيها بتظهر حقيقته اللى بتبان جوه البيت،

فالرجل مهما تجمل أمام الناس, ميقدرش أبدأ انه يتجمل أمام زوجته. فصدق النبى حين قال: "خيركم خيركم لأهله" الشخص الطيب بجد هو اللى طيب مع اهله فى البيت وده احسن واحد فيكم ♡..طيب النبى صلى الله عليه و سلم بقى تزوج من تسع نساء، والتسعة أجمعوا على كمال أخلاق النبى و رقه معاملته و حسن خلقه المبهر و تعاونه..و كان يوصفوه بإنه "كان قرآنا يمشى على الأرض", فنفهم من ده ان لو النبى كان قاصد يتجمل أمام السيدة عائشة, فميقدرش يتجمل أمام السيدة حفصة بنفس الطريقه  و هكذا مع الباقى.. فصدق و كمال النبى كان فى ثبات معاملته بنفس الاخلاق مع كل زوجاته.

حاجه كمان مهمه جدا  .. يعنى ايه الحديث المتواتر.. الاحاديث النبويه وصلت لنا ازاى؟ عن طريق التواتر .. و دقه الاحاديث دى مدروسه فى  علم اسمه علم الحديث .. و الحديث المتواتر ده  اعلى درجات الصحه فى الحديث..طب ليه؟ عشان شروطه بتحدد ان 9 او 10 اشخاص ينقلوا كلام النبى مباشره و يكون كلامهم متطابق .. يعنى مثلا النبى يقول حديث, فيسمعه 10 من الصحابة,  و كل واحد منهم يبلغ 10 تانين و هكذا بيستمر التواتر لحد ما يوصل لنا حديث النبى عليه الصلاه و السلام ..

فبسبب الشرط الدقيق ده لا يمكن  ان الأعداد دى كلها تكذب أو تألف الحديث. طيب وده علاقته ايه بالتعدد؟..النبى متزوج 9 فالنبى لما يقول حديث, التسع زوجات يتفقوا عليه, وكل زوجة تبلغه ل 9 أشخاص, وكل شخص من ال9 يبلغ 9 تانين, فلو كان عدد نساء النبى اقل من 9 مكنوش حيبلغوا حد التواتر :) ..و النبى محمد هو نبى اخر الزمان يعنى مفيش نبى تانى حيجى للبشريه من بعده .. فعشان كده لازم كل اللى يخصه يوصل لنا بدرجه عاليه و موثوق منها..و دى حكمة ربنا من اختيار 9 زوجات بالذات عشان الاحاديث اللى حينقلوها تبلغ حد التواتر..

طيب كمان فى حاجه مهمه جدا عن تعدد زوجات النبى.. هيه أن النبى لم يتزوج إلا بأمر إلهى. الوحيدة اللى النبى اختارها هى "السيدة خديجة بنت خويلد". فاكرين زواج النبى من السيدة عائشة؟ لما النبى قال لها: "يا عائشة انى أريتك فى المنام ثلاث, يأتى بك الملك فى سرقة من حرير, ويقول يا محمد هذه زوجتك فى الدنيا و الآخرة, فأقول ان يكن هذا خير من عند الله يمضه" , ويقول ابن عباس: "رؤيا الأنبياء وحى", يعنى زواج النبى من السيدة عائشة كان أمر من الله,

  والدليل ان تعدد زواجات النبى أمر إلهى يخص النبى فقط هو ان غير مسموح للنبى انه يطلق واحده من زوجاته و لو واحده ماتت مينفعش يتزوج مكانها واحده تانيه زى اى مسلم .. ربنا قال للنبى: "لَّا يَحِلُّ لَكَ النِّسَاءُ مِن بَعْدُ وَلَا أَن تَبَدَّلَ بِهِنَّ مِنْ أَزْوَاجٍ وَلَوْ أَعْجَبَكَ حُسْنُهُنَّ إِلَّا مَا مَلَكَتْ يَمِينُكَ ۗ وَكَانَ اللَّهُ عَلَىٰ كُلِّ شَيْءٍ رَّقِيبًا" سورة الأحزاب ..يعنى ربنا أمر النبى انه ميطلقهمش ... طيب هل فى زوج من المسلمين ربنا أمره بعدم الطلاق؟ لأ .. طيب يبقى النبى  زى ما ربنا  خصه بحكم الزواج من تسع نساء .برده خصه بحكم أنه ميطلقش  ولا واحده فيهم..فده دليل ان كل ده كان خصائص نبوية..زى نزول الوحى، هوه ينفع أى حد ينزل عليه الوحى ؟ لأ طبعا دى أمور تخص النبى فقط .. كذلك برده زواج النبى من 9 نساء كان من خصائصه وليست سنة تتبع.. مينفعش حد يتزوج تسعه غير رسول الله  فقط..

كمان النبى بس من حقه ان سيدة تهب نفسها له و تعرض نفسها عليه للزواج, يقول الله فى القرآن: "وَامْرَأَةً مُّؤْمِنَةً إِن وَهَبَتْ نَفْسَهَا لِلنَّبِيِّ إِنْ أَرَادَ النَّبِيُّ أَن يَسْتَنكِحَهَا خَالِصَةً لَّكَ مِن دُونِ الْمُؤْمِنِينَ قَدْ عَلِمْنَا مَا فَرَضْنَا عَلَيْهِمْ فِي أَزْوَاجِهِمْ وَمَا مَلَكَتْ أَيْمَانُهُمْ لِكَيْلَا يَكُونَ عَلَيْكَ حَرَجٌ وَكَانَ اللَّهُ غَفُورًا رَّحِيمًا" سورة الأحزاب. يعنى دلوقتى البنت لا تهب نفسها لأحد, ولا ينبغى أن تعرض الزواج على أحد, يعنى دى من خصائص النبى فقط, و رغم كده النبى لما كانت بتيجى إمرأة توهب نفسها له.. كان بيرفض انه يتزوجها إلا إمرأه واحدة فقط و هى السيدة "ميمونة بنت الحارث" وهنحكى قصتها يوم فتح مكة بعد كده..

فى حاجه مهمه لازم نعرفها و هيه ان فى  حديث عن السيدة عائشة بيقول: "والله, ما مات رسول الله إلا و قد أحلت له النساء" دة معناه ايه؟ احنا قولنا ان النبى كان بيتزوج بأمر إلهى.. وربنا امره انه لا يطلق و لا يتزوج تانى ابدا.فالسيده عائشه قالت أن النبى قبل ما يموت بفترة ربنا سمح له بالزواج يعنى يا محمد لو عايز تتزوج لك الحرية فى الزواج .. بس النبى اختار انه ميتجوزش تانى.. طب ليه ربنا سمح له بالجواز بعد ما أمره بأنه ميتجوزش؟

عشان ربنا حب يبين  ان النبى هو اللى رفض الزواج بعد التسعه زوجات بإرادته.. طيب ايه الحكمه من انه يبان ان النبى رفض بإرادته؟  الحكمه هى ان ربنا بيحمى النبى من ان اى حد  يقول ان النبى متجوزش عشان بس ربنا كان مقيد النبى بال9 زوجات فقط.. فيقولوا ان محتمل ان النبى يكون كان عايز يتجوز 20 او 30 ست بس كان غير مسموح له بده..فربنا بعد كده سمح للنبى بالزواج بعد ال9  عشان يحميه من الكلام ده ♡. ويخلى البشريه تعرف قد ايه النبى كان لا يقبل أبدآ التعدد بهدف الرغبه..و على فكره النبى كان من السهل جدا انه يتزوج لانه كان جميل وكان لا يشيب, على الأقل كان ممكن يقبل السيدات اللى عرضوا نفسهم عليه(وهبوا نفسهم له) لكن النبى أختار ان لا يتزوج بعد ال 9 زوجات أبدا.. صلى الله عليه و سلم