سيرة سيدنا النبى صلى الله عليه وسلم (الحلقة السابعة والعشرون)

الحلقة ( 27 )
يلا صلوا على النبى :)
رحلة الإسراء و المعراج من الأرض للسماء(ج3)
قم يا محمد إلى لقاء الله <3
و شفنا الجنة امبارح مع النبى عليه الصلاة والسلام و شاف قصور و آنهار وحاجات تانية بديعة و عجيبة لكن النبى حبيبك اللى أخلاقه القرآن شاف كل الحاجات المدهشة دى ورغم كده ربنا قال لنا علي النبى ﷺ:"مَا زَاغَ الْبَصَرُ وَمَا طَغَى" يعنى لا بص هنا ولا خطف نظرة هنا ده احنا لو دخلنا قصر بيجذبنا جماله ونفضل نتطفل ونبص هنا وهنا وحبيبنا النبى عليه الصلاة و السلام طلع فوق السبع سموات لكن كان فى قمة الأدب شاف على قد ما بالصدفة عينه شافت ..
و بعدين يطلع النبى و يطلع، قال تعالى: ثُمَّ دَنَا فَتَدَلَّىٰ*فَكَانَ قَابَ قَوْسَيْنِ أَوْ أَدْنَى" وصل النبى لمنزلة و مكانة شريفة بتدل على حب الله للنبى عليه الصلاة والسلام و قاب قوسين يعنى اد المسافة اللى بين قوسين عكس بعض)( وسجد النبى و دعا ربه.عشان كده النبى قال: "أقرب ما يكون العبدُ من ربه و هو ساجد " طيب هل النبى شاف ربنا وللا لأ ؟ اختلف العلماء فى ده.. الله أعلم.. و حينزل النبي وقلبه متعلق بعرش الرحمن ♡،،
تخيلوا بعد كل الصفاء ده حينزل النبى تاني لعذاب قريش..و على فكرة النبى كان بعد الإسراء والمعراج لما يسمع الله أكبر يترعش و فى سجوده يقول: سجد لك سمعي وبصري وقلبي وعظمي ومخي وعصبي و لحمي.تعالوا نحس بالتسبيح ده "سبحان ربي الأعلي" هو فعلا أعلي من كل شئ ليس كمثله شئ، شفتوا النبى وهوه طالع السموات مع جبريل عدى كواكب و مجرات ياااه سبحان ربى الأعلى العظيم :') ♡..
فينزل النبي من الإسراء و المعراج و هو جميل و مرتاح أوي .. المفروض لو حد كان مكانه و وصل للمنزله دى و حصلت له هذه الرفعة كان ممكن ينزل متكبر "أنا مُحمد .. أنا وصلت لأقرب ما يكون من الله عزوجل" بس النبى متغَرش بالعكس النبى إزداد تواضعاً على تواضعه..بيحكى سيدنا أنس خادم الرسول صلى الله عليه وسلم و يقول "والله خدمت النبي 10 سنين فما قال لي أفٌ قط .. ولا قال لي لشئ فعلتهُ..لمَ فعلته؟ .. ولا لشئ تركته..لمَ تركته؟ و كنت إذا تأخرت عليه في طلبٍ بعثني له ،قام بنفسه و ذهب فقضاه هو عليه الصلاة والسلام.. تعرفوا إن الرسول كان بيحب أنس و دعا له و قال : "اللهم بارك في عمر أنس و كثر ولده و ماله و أدخله الجنة"
فكان أنس يبكي من الحديث ده و يقول "دعى ليَ النبي صلى الله عليه وسلم أن يُبارك الله في عمري [فمات عنده 110 سنة] و دعى لي أن يُبارك الله في ولدي و في مالي و أنا والله أكثر الأنصار مالاً و أكثر الأنصار ذرية .. و ها أنا أنتظر الدعوة الرابعة [و أدخله الجنة]" طب أنس بيبكى جامد ليه؟ عشان النبى دعا إن ربنا يبارك فى عمر أنس.. وبعد موت النبى، أنس مشتاق للقاء النبى و حزين لأن بقى عمره طويل بعد دعاء النبى له♡ ..
حتى فى وقت موت أنس لما كان بيحتضر فضل يبكي بكاء شديد .. فقالوا لمَ تبكى يا أنس؟ ألستَ صاحب رسول الله؟فبكى أكثر ..فقالوا ما بك يا أنس؟..ماذا تشتهى يا أنس من الدنيا؟ فقال أنس: لا أشتهي إلا أمراً واحداً .. أن أرى حبيبي مُحمد و أقول له يوم القيامة..يارسول الله ..انا أُنيس ،خادمك أُنيس يارسول الله". اصل ده الاسم اللى كان النبى عليه الصلاة و السلام بيدلعه بيه ♡
المهم نزل النبى من السماء للمسجد الأقصي ومنه رجع للبيت الحرام..فيلاقي مكان نومه لسه دافئ ،سبحان الله كأن كل ده حصل فى اللا زمن..و ارتاح النبى وتاني يوم صحي مهموم طب ليه؟ النبى عمال يفكر احكي للناس وقريش تضحك عليا وللا محكيش وابقي كده بكتم وحي من الله! .. فيعدي أبو جهل وبسخرية ويقوم قايل: مابك يا مُحمد ، أراك مهموم؟ فالنبى سكت ..فسأله تاني فالنبي قام حكي له كل اللي حصل! فأبو جهل قال له: أحقاً يا مُحمد ؟ فقال النبى: نعم.فقال أبو جهل :ما رأيك فى أن أجمع لك قريش فتخبرهم بما قلت لي..؟ فقال النبي: أجل، فقال أبو جهل: كما أنت (يعني كإنه بيقوله هجمعهم لك حاضر.. عشان نضحك على اللي بتقوله شويه.. بس طبعا الصحابة حيصدقوا النبى)

فراح أبو جهل جاب رجال قريش و رجع للنبي و قال أُقصص يا مُحمد ما قلته" فقال النبي والله دخلت المسجد الأقصى فصليت بالأنبياء و فضل يحكى كل اللى حصل.. طب و أيه كان رد فعل قريش؟ منهم اللى ضحك و منهم اللى صقف و صفر إستهزاءاً بالكلام و منهم اللى رمى التراب على وجه النبي صلى الله عليه و سلم و منهم اللى شتم.. فقام واحد من كبار المشركين راح قايل :يا مُحمد صف لنا الأنبياء..فقال :أجل، وبدأ يوصف سيدنا عيسى روح الله وقال فرأيته رجلاً طويلاً بعيدُ ما بين المنكبين..عظيم الفم ..جميلاً ..شعره كأنه خرج من ديماس [يعنى كأنه خارج أخد حمام يعنى شعره كأنه مبلول..ناعم أوي ] وراح قايل كأنه شبهه عُروه بن مسعود الثقفي..
و أما موسى فرأيته رجلاً طويلاً أسمر اللون.. أجعد الشعر و "عنده سنتين قريبين من بعض أوي أو راكبين فوق بعض يعنى مش جميل زي عيسى " (بس تعرفوا رغم ان سيدنا موسى مكنش بجمال سيدنا عيسى إلا ان ربنا عز وجل قال:" وَأَلْقَيْتُ عَلَيْكَ مَحَبَّةً مِّنِّي وَلِتُصْنَعَ عَلَىٰ عَيْنِي" فكان كل اللي يشوف سيدنا موسى يحبه اوى..سبحان الله) و راح النبى قايل : و موسى كأنه من رجال شنوءة (دي قبيلة كلهم سُمر و أجسامهم قوية البنية) .. و أما إبراهيم خليل الله فكان أشبه الناس بي خَلقا و خُلقا" (شَبه النبى عليه الصلاة و السلام أكيد كان جميييل اوى ^_^) ..فقام واحد قايل : يا مُحمد صف لنا المسجد الأقصى ( أوصفه بقى باب باب :و مدخل مدخل، مش انت بتقول إنك رُحت يا مُحمد...طيب اوصف بقى) .. فراح النبي عليه الصلاة و السلام قايل: دخلت المسجد ليلاً و خرجت ليلاً و الله لم أره، فضحكت قريش و قالوا أرأيتم..يكذب عليكم..
(طب ربنا حيسيب النبى كده؟..لأ..أبداً ..) سبحانه و تعالى نزل جبريل من فوق سبع سموات و خلاه يرفع المسجد الأقصى على جناحه عشان الرسول يقدر يوصف المسجد و هو شايفه بعنيه .. و راح قايل له : "أُقصص عليهم يا مُحمد" و يبدأ النبي يوصف المسجد "باب كذا و مدخل كذا" و قريش واقفه مخضوضة لإنه بيوصف وصف دقيق أوى .. دى كانت معجزة و راح النبى قايل: يا معشر قريش لقد مررتُ على قافلة بني فلان بالروحاء و سلمت عليهم و سقوني ماءاً.. فرجال قريش راحوا وقفوا على أبواب مكة مستنين القوافل اللى جاية من الشام وعدت عليهم القافلة اللى النبى عليه الصلاة والسلام قال عليها و سألوهم أنتوا بجد مُحمد عدى عليكوا امبارح؟ .. قالولهم أه سلم علينا و شرب عندنا مايه.

فرجعوا للنبى و قالوا والله هذه آية من الله كيف عرفت هذا..فراح النبى قايل لهم و مررت بقبيلة بني فلان "قبيلة تانية" و كان لهم ناقة عليها جوالق "الكسوة بتاعت الجمل" فيها خطوط بيض وسلمت عليهم فسألوهم عن ذلك .. فراحوا فعلا و سألوا القبيلة و قالولهم : ايوه عدى مُحمد علينا في نص الليل بين الشام "فلسطين" و مكة ..فقالوا والله هذه آية (معجزة)..فراح النبى قايل: و و الله يا معشر قريش رأيت قبيلة بني فلان خرجت من التنعيم و هى فى الطريق إليكم و ستدخل عليكم الآن من قِبل الثنية .. فلقوا القبيلة داخلة بجد .. فقالوا والله هذه آية ..و كانوا حيؤمنوا خلاص فوقف الوليد بن مغيرة
(فاكرينه؟ ده اللى نزلت فيه الآيات "ثُمَّ نَظَرثُمَّ عَبَسَ وَبَسَرَثُمَّ أَدْبَرَ وَاسْتَكْبَر" ده اللى سمع القرآن و اقترح على قريش انهم يقولوا ان النبى ساحر) و قال الوليد: "يا معشر قريش أتؤمنون له .. والله سحر أعيننا و أعين القبائل هو ساحر .. هو ساحر..فلا تصدقوه" فقالت قريش "ساحرٌ .. ساحرٌ لا نصدقك أبدا"..

(مفيش فايده  😭 و راحوا لأبو بكر رضى الله عنه وقالوا له: يزعم صاحبك أنه صلى فى المسجد الأقصى ليلآ و عاد مكة ليلآ .. فقال أبو بكر :أتُكذبونه؟ قالوا: نعم، فقال أبو بكر والله لئن كان قالها فقد صدق..إني لأصدقه فيما أبعد من ذلك، أُصدقه في خبر السماء يأتيه في غدوة أو روحة، إن كان محمد قال هذا: فقد صدق ..و كان كل ما النبى يحكى عن اللى شافه فى الإسراء و المعراج يرد ابو بكر عليه و يقوله :صدقت ..و من هنا سماه النبى ب"الصديق" وكان دايما النبى يقول: إنَّ الله بعثني إليكم، فقلتم: كذبت..وقال أبو بكر: صدقت..عايز اقولكم على حاجة جميلة قالها الشيخ الشعراوى رحمه الله : ربنا عز وجل قال" سُبْحَانَ الَّذِي أَسْرَىٰ بِعَبْدِهِ لَيْلًا مِّنَ الْمَسْجِدِ الْحَرَامِ إِلَى الْمَسْجِدِ الْأَقْصَى"..و ماقلش سرى عبدى .. يعنى الموضوع تم بقدرة ربنا و ربنا هو اللى وصّل النبى هناك..فكان مش غريب و لا عجيب ان ده يحصل لان الله على كل شئ قدير..فعشان كده قريش غلطت لما كذبت النبى لأنه النبى مقلش إنه راح الشام بقدرته هو صلى الله عليه و سلم ولكن بقدرة الله تعالى ..
المهم رجع النبى ﷺ للصحابة و قريش مصدقتش و قعد معاهم .. هتحكيلهم أيه يا رسول الله؟ حيحكيلهم عن الجنة ..اصل النبى عاوز يثَبت الصحابة ..فيبدأ يحكيلهم عن الجنة .. و يقول والله رأيت فيها الأبنية من ذهب و فضة و مناطها مسك و ترابها الزعفران و حُصاها من اللؤلؤ و الياقوت و المرجان و الشاب فيها لا يشيخ أبدا و لا يموت فيها أحداً أبدا و لا يبلى نعيما فيها أبدا والله إن منزلة أدنى أهل الجنة ليرى ملكه مسيرة 2000 سنة لا يقطعه.. فقالوا يارسول الله و ماذا عن أعلى منزلة في الجنة؟. فقال النبى: ذلك الذي يري و جه ربه بكرة و عشيا "صبح و بليل"..( في ناس هتشوف ربنا صبح و بليل..اصلها درجات..ممكن حد يقول طيب ادخل اى درجة و خلاص..صح؟.. بس متنسوش ان ده حيبقى مكانك للأبد يعنى الدرجة و النعيم اللى فاتك مش حتقدر توصله نهائيآ..تخيل واحد للأبد حيبقى مع النبى طول النهار و الليل و واحد تانى لأ :')..قال تعالى:( قُلْ يَا قَوْمِ اعْمَلُوا عَلَىٰ مَكَانَتِكُمْ إِنِّي عَامِلٌ)
و يفضل يحكى النبى عن الجنة و يقولهم والله فيها ما لا عينُ رأت ولا أذنُ سمعت ولا خطر على قلب بشر .. فيقوم قايل: رأيتُ قصراً جميلاً عظيماً فقلت للملائكة : لمن هذا القصر؟ قالوا: لفتى من قريش.فقُلت:من ؟ فقيل "لعُمر بن الخطاب" و رأيت فتاة من الحور ثم تذكرت غيرتك يا عُمر فوليت مدبراً (مشيت).. فبكى عُمر وقال: أوعليك أنت أغار يا رسول الله (بقى اضايق و أغير على حاجة منك يا رسول الله) عُمر كان عارف أن قصره فوق في الجنة و رغم كده عاش كل عمره متواضع و لما يجي يموت حيقول "والله لو قيل لي إن كل أهل الدنيا يدخلون الجنة إلا رجلاً واحداً لقلت هو أنا .. و عُمر كان يقول: "أخشى أن يسألني الله إذا عُثرت دابة في العراق، و يقول الله لى: لما لم تمهد للدابة الطريق يا عُمر ؟" طبعا الكلام ده قولناه في قصة حياة سيدنا عمر  💖
طيب دلوقتى قريش مضايقة و رجعت تضايق النبى و الصحابة.. و بقى شئ لا يمكن حد يستحمله طب و إيه الحل؟