سيرة سيدنا النبى صلى الله عليه وسلم (الحلقة الخامسة عشرة)

الحلقة ( 15 )
يلا بينا صلو على النبى ^_^
راجل اسمه "عمران بن حصين" ،عمران ده أسلم من فتره وموجود حاليا في دار الارقم مع النبىﷺ فالباب خبط .. مين بيخبط؟ .. حصين..ده "ابو عمران" فبسرعه عمران راح استخبي من ابوه عشان ابوه ميعرفش انه اسلم فدخل حصين وقال : يا محمد ألم تنته بعد ؟ فيقول النبيﷺ: ياحصين كم إله تعبد ؟ فيقول حصين: سبعة في الارض و واحد في السماء ..
 فالنبىﷺيبتسم و يقول: يا حصين إن مرضت فمن تدعوا ؟قال حصين: الذي في السماء. قالﷺ: و إن هلك المال فمن تدعوا ؟ قال حصين : أدعو الذي في السماء .. فقال صلي الله عليه وسلم : يرزقك وحده وتشرك معه غيره ؟ (بقى الرزق من عند الله و الشفا من عند الله ولما تعبده ،تعبد جنبه 6 اصنام!!) فقال حصين : ولكني أخشي قريش يا محمد فقالﷺ لا تخف إنّا معك .. فقال حصين : اشهد انه لا إله الا الله وأنك رسول الله .. فخرج عمران بن حصين من الحته اللى كان مستخبى فيها و حضن أبوه وهو بيبكي ..
المسلمين في زيادة مستمرة و قريش مدايئه..فقريش فكرت تهدد ابو طالب" عم النبى" فراح كبار قريش وقالوا: يا ابو طالب ان ابن اخيك شتم آلهتنا و استهزا بدينا و فرق بينا فإما  تخليه يبطل يدعو للإسلام أو إما تبطل تحميه و تسيبو لنا بئه.. فأبو طالب "عم النبى" طيب خاطرهم و سكتوا.
لكن راحوا لأبو طالب مره تانيه وهمه منفعلين وقالوا يا أبا طالب ان لك فينا سناً وشرفاً (احنا صابرين على محمد عشانك وعشان مكانتك فى قريش ) وقالوا: لو محمد مبطلش حنبقى ضدك و حنأذيه.
فنادي ابو طالب النبيﷺوقال له: يا ابن اخي ان قومك قالوا لي كذا وكذا .. فلا تحملني من الامر ما لا أطيق ..(كفايه يا محمد انا مقدرش على كده) فقال النبى عليه الصلاه والسلام : والله ياعم لو وضعوا الشمس في يميني والقمر في شمالي علي ان اترك هذا الدين ماتركته .. وخرج رسول الله من عند عمه وهو يبكي :') ♡.
فأبو طالب مستحملش يشوف النبى ﷺ زعلان بالشكل ده فنادي عليه وقال يامحمد.يا ابن اخى..قل ما شئت و والله ما ازال أحوطك حتي أموت(حفضل احميك لحد ما اموت)ففرح النبي ﷺفرح شديد .. 
و يستمر الإيذاء و يزيد معاه ثبات النبىﷺو الصحابه .قريش عملت حاجه وحشه جدا لازم نعرفها سوا قريش بعتت واحد اسمه "النضر بن الحارس" لبلاد الفرس علشان يتعلم كل الاساطير و القصص بتاعتهم و يحفظها، فكل ما النبي ﷺ يجي يتلو على الناس قرآن ..يروح النضر يقول للناس سيبكم من كلام محمد و تعالو اسمعو انا ححكيلكم حاجات أحسن منه و يفضل يقولهم قصص و اساطير الفرس ،، مش بس كده دى قريش جابت بنتين (جوارى) بيغنو و يرقصو و سكنوهم فى بيت و قالولهم كل ما تشوفو محمد بيكلم حد روحوا خدوه من محمد و اكلوه و شربوه خمرا لحد ما ينسى اللي محمد قاله :( ..
ومش بس كده، كمان بدأو يقولوا كلام للنبىﷺعجيب جدا..زي ايه..؟ قالو : هو ربنا ملقاش احسن منك يبعته .. طيب ما كان يبعت ملاك احسن.. فينزل القرآن يرد عليهم قال تعالى: وَقَالُوا لَوْلَا أُنزِلَ عَلَيْهِ مَلَكٌ وَلَوْ أَنزَلْنَا مَلَكًا لَّقُضِيَ الْأَمْرُ ثُمَّ لَا يُنظَرُون ..يعني إيه لقضى الامر؟ يعنى مكنش هيبقى ليهم فرصه للتفكير.. خلاص يا إما يؤمنوا يا إما يتعذبوا..فالحمدلله رب العالمين ♡
و برده قريش مش هتكست، قالوا: اصلاً الكلام ده شعر.. فالقرآن يرد عليهم " وَمَا هُوَ بِقَوْلِ شَاعِرٍ قَلِيلًا مَّا تُؤْمِنُون"و يجى فى مره  واحد اسمه أُبي بن خلف (صاحب "عقبه" الأنتيم ،حكينا عنه قبل كده ^_^ ) راح للنبىﷺ و هو ماسك شوية تراب و قاله بكل سوء ادب : انت بتقول ان ربك يحي هذا ؟؟ ( قصده يرجع الانسان للحياه بعد ما يموت و يبقى تراب ) و يقوم رامى التراب في وش النبي الشريفﷺ.فيرد النبى ﷺ اجل يا "أُبي" ان الله يميتك ثم تدفن في قبرك ثم يبعثك.
ونزل فى الموقف ده قول تبارك وتعالى:  وَضَرَبَ لَنَا مَثَلًا وَنَسِيَ خَلْقَهُ قَالَ مَن يُحْيِي الْعِظَامَ وَهِيَ رَمِيم*قُلْ يُحْيِيهَا الَّذِي أَنشَأَهَا أَوَّلَ مَرَّةٍ وَهُوَ بِكُلِّ خَلْقٍ عَلِيم .
و تستمر قريش فى إيذائها للنبى صلى الله عليه وسلم، بس المره دى الإيذاء سخيف اوى، قريش جابت ولد جميل و متعلم  و خدوه و راحوا لأبو طالب و قالوا: يا أبا طالب إنَّا نراك تحب الأولاد..فخذ أبننا هذا لتربيه وأعطنا محمد، فقال أبوطالب: والله ما أنصفتموني (ده ظلم) تعطوني غلامكم أسمنه لكم و أربيه وأعطيكم ابني تقتلوه،أخرجوا عني ليس لكم عندي أمر.. 
وبعدين يحصل موقف جميل جدا هنعرف منه أن ربنا مكنش بيسيب النبى ﷺ، طب أمال ليه كل الإيذاء ده حصل؟ علشان نحس بالمسئولية ناحيته ﷺ :') عشان نتعلم الصبر و الثبات ونحس اننا شايلين الأمانة و نعرف ان الموضوع مكنش سهل..
الموقف اللى حصل هوه أن  واحد من بره مكة، راح لكبراء قريش و بيشتكى و يقول: إن "أبا الحكم" أخذ منى مالاً ويأبى أن يرده إلى ّ ( أبا الحكم مش عايز يدينى فلوسى .. ابا الحكم ده اسم أبو جهل القديم على فكره ^_^  ) المهم الراجل بيطلب منهم و يقول : فمن منكم يأتينى بمالى من أبا الحكم ؟؟ (حد يجيب لى فلوسى منه). 
كفار قريش لاقوها فرصة عشان يدايئوا النبى ﷺ ..فعملوا ايه؟ قالوا للراجل: محدش هيعرف يجيبلك فلوسك غير الراجل اللى هناك ده .. محمد ﷺ.
(طبعا بيهرجواً ،هو محمد يقدر على أبو جهل دلوقتى!! همه شايفين انهم بكده حيحطوا النبى ﷺفى موقف صعب و يحرجوه..لأنهم فاكرين انه ضعيف من وجهه نظرهم) المهم الراجل صدق وقام راح للنبى ﷺ وكان بيصلى، فأول ما النبى ختم الصلاة قام الراجل قايله : يا محمد إن أبا الحكم يرفض أن يعطينى مالى و إن هؤلاء يزعمون أنه لن يأتينى بمالى من أبا الحكم إلا أنت..
فراح  النبى ﷺ باصص عليهم لاقاهم واقعين على نفسهم من الضحك ، 
فالنبى بصلهم وبص للراجل وقال ﷺ: أجل يا أخى أنا آتيك بمالك :) (شايفين القوة، خودوا بالكم النبى عليه الصلاة و السلام عارف انه هيتأذى بس واثق فى ربه، عارف أن ربنا مش هيضيعه و عارف ان الرسالة ليها تمن وان النبوة مش بالساهل ، آيات كتير من القرآن ثبتت النبى ﷺ قال تعالى : ”فَاصْبِرْ كَمَا صَبَرَ أُولُو الْعَزْمِ مِنَ الرُّسُلِ وَلَا تَسْتَعْجِلْ لَهُمْ “..”وَاصْبِرْ وَمَا صَبْرُكَ إِلَّا بِاللَّهِ ۚ وَلَا تَحْزَنْ عَلَيْهِمْ وَلَا تَكُ فِي ضَيْقٍ مِّمَّا يَمْكُرُون..َ “”وَاصْبِرْ لِحُكْمِ رَبِّكَ فَإِنَّكَ بِأَعْيُنِنَا “ شوفوا كام أيه ربنا بيصبر بيها النبى ﷺ ويثبته و يطبطب عليه والنبى كان بيصبر و يحتسب الأجر من الله عز وجل♡)
 و فعلا ياخد النبى ﷺالراجل من أيده ويروحوا على بيت أبو جهل ويخبط (وكفار قريش واقفين هناك هيموتوا من الضحك ومستنين يشوفوا أبو جهل هيعمل فى النبى ايه وهيأذيه ازاى !! ) فأبو جهل فتح الباب. فقال النبى ﷺ: يا أبا الحكم أخذت من هذا الرجل مالاً ؟ فقال ابو جهل: : نعم.. فقال النبى ﷺ:وترفض أن ترد للرجل حقه و ماله ؟ قال ابوجهل : أجل ،فقال النبى ﷺ: أعطى الرجل ماله الأن ..
العجيب أن أبو جهل سمع الكلام و قال: أجل سأفعل..ودخل بسرعه و جاب الفلوس و أداها للراجل وجرى قفل الباب و هوه بيترعش !! .. قام الراجل أخد فلوسه وشكر النبى ﷺ
 ومشى و النبى كمان مشى   ^_^ 
بس كفار قريش كانوا فى حالة ذهول وغضب فجريوا على أبو جهل خبطوا عليه ففتح لهم، فقالوا : تباً لك !! والله ما فعلنا هذا إلا لنستهزئ بمحمد ..ماذا بك؟!( ايه الى جرالك ؟) ، عارفين ابو جهل قال لهم ايه ؟ قال :والله لقد رأيت خلف محمد فحل إبل ينظر الىّ لإن لم أعطى الرجل ماله أكلنى .. معجزة من معجزات النبى ﷺ ،  النبى ﷺ  :)  و كأنه لو مسمعش كلام النبى ﷺ ، الوحش ده كان هيهجم عليه، سبحان الله يمكن ده ملاك او مخلوق من  مخلوقات الله سبحانه وتعالى :) الله اعلم!!
 قال تعالى : وَمَا يَعْلَمُ جُنُودَ رَبِّكَ إِلَّا هُوَ