سيرة سيدنا النبى صلى الله عليه وسلم (الحلقة الثالثة والثلاثون)

الحلقة ( 33 )
يلا صلوا على النبى :)
هجره نبينا ﷺ من مكه للمدينه (ج4) 

دلوقتى النبى عليه الصلاه والسلام فى طريقه للمدينه طريق طويل و صعب اوى وطبعا ده عشان يقدر يهاجر من غير ما قريش تمسكه و تمنعه من الهجره .. ابن اريقط مولى (خادم) ابو بكر مشى معاهم شويه وآدى خدمته و دلوقتى سابهم (وعلى فكره مش وارد فى السيره اذا كان اسلم والا لأ) .. و النبى و ابو بكر و عامر فى الطريق حسوا انهم جعانين و عطشانين اوى.. فمروا على خيمه فيها إمرآه اسمها " أم مَعْبد " و طلبوا منها تمر و لبن عشان يشتروا منها و لكن ملاقوش عندها اكل للأسف .. فالنبى بيبص كده فلاقى معزه صغيره  فقال : " ما هذه الشاة  ؟ "

 قالت : شاة خلفها الجهد عن الغنم (دى ضعيفه) ، فقال : " هل بها من لبن ؟ " قالت : هي أجهد من ذلك ، قال : " أتأذنين إلي أن أحلبها ؟ " قالت : نعم ، ، إن رأيت بها حلبا فاحلبها ، فالنبى قال أحضروا الشاه ..  فبدأ النبى يمسح بأيده الشريفه على ضرع الشاه  و يدعى ، فالضرع بقى فيه لبن فقال احضروا إناء  و فضل النبى يحلب المعزه دى لحد ما الطبق اتملا على آخره.. فشربوا كلهم و شبعوا و فضل كمان لبن لأم معبد و مشيوا..

 و بعد شويه زوج أم معبد جه  فلما شاف أبو معبد اللبن استغرب جدا جدا وقال : من أين لك هذا اللبن يا أم معبد والشاة عازب ، ولا حلوبة في البيت ؟ فقالت : مر بنا رجل مبارك ، من حاله كذا وكذا ، قال : صفيه لي يا أم معبد ..( ركزوا بقى معايا عشان ام معبد وصفت النبى بدقه رهيبه :') ♡..فقالت أم مَعْبد:  " رأيت رجلاً ظاهر الوضاءة، أبلَجَ الوجهِ (وشه منور )،لم تَعِبه نُحلَة (جسمه مش رفيع الرفع الوحش) ولم تُزرِ به صُقلَة( و مش تخين)، وسيمٌ قسيم (جميل و وضيء)، في عينيه دَعَج(يعنى سواد)، 

وفي أشفاره وَطَف (رموشه جميله طويله )، وفي صوته صحَل (بحَّة و حُسن وجمال)، و في عنقه سَطع (طول)، وفي لحيته كثاثة(كثرة شعر)، أزَجُّ  (حواجبه طويله و مقوسه )، إن صَمَتَ فعليه الوقار، و إن تَكلم سما و علاهُ البهاء، أجمل الناس و أبهاهم من بعيد، وأحلاهم و أحسنهم من قريب، حلوُ المنطق (فصيح و حروفه واضحه)، فصل لا تذْر ولا هذَر (كلامه فى النص  لا  بالقليل ولا بالكثير)، كأنَّ منطقه خرزات نظم يتحَدَّرن (كلامه مسترسل و تحب تسمعه) 

 رَبعة  لا يأس من طول، ولا تقتَحِمُه عين من قِصر(لا طويل و لا قصير) غُصن بين غصين( هوه و اصحابه فيهم حسن و جمال) ، فهو أنضَرُ الثلاثة منظراً، وأحسنهم قَدراً، له رُفَقاء يَحُفون به(له صحاب دايما حواليه.. يعنى فيه هيبه ) إن قال أنصَتوا لقوله، وإن أمَرَ تبادروا لأمره، محشود محفود ( لو بس قال كلمه أطاعوه فورآ)، لا عابس ولا مُفَنَّد (وشه مش مكشر ، وكلامه خالٍ من الخُرافة يعنى معقول  فيه حكمه)   الله  يا جمال سيدنا النبى .. اللهم صل على أكمل و أجمل خلقك... اللهم نسألك رؤيه النبى فى المنام ..
 و بعد ما سمع أبو مَعْبد الوصف ده راح قايل  : هو والله صاحب قريش الذي ذكر لنا من أمره ما ذكر بمكة ولقد هممت أن أصحبه ، ولأفعلن إن وجدت إلى ذلك سبيلا ( ده هوه ده اللى قريش بتتكلم عنه والله انا كنت ناوى اروح معاه و اتبعه و والله نويت أتبعه ♡)..

الرسول مر من مكان اسمه عسفان و اتسمى المكان بالأسم ده بسبب من تعسف و صعوبه المشى فيه و على فكره  المكان ده كان مخصص لمرضى الجزام لانهم لازم يقعدوا فى حته بعيده اوى عن الناس  .فتخيلوا التعب و المشقه اللى النبى عليه الصلاه والسلام مر بيها و حر الشمس كمان ..النبى بدأ يقترب من المدينه و يحصل شئ عظيم ربنا قدره شوفوا معايا حكمة ربنا عز وجل الرحيم الكريم فيقدر ربنا ده فى توقيت مهم.. ايه اللى حصل؟ الزبير بن العوام يبقى راجع  بقافلته من الشام الى مكة (جمال متحمله ببضاعه ) فيقابل النبى في الطريق ..صدفه ♡..طبعا مفيش صدف كل شئ مدبر بحكمه الله الحكيم ..

فيبدأ النبى يحكى للزبير عن الهجره من مكه للمدينه لأن الزبير مكنش يعرف شئ عن الهجره ..ففرح الزبير جدا و يقدر ربنا ان نوع التجاره اللى راجع بيها الزبير تكون ملابس.. وكأن ربنا عز وجل لا يرضى لنبيه عليه الصلاه و السلام انه يدخل المدينه بلبس حالته بقت صعبه بسبب الرمال والسفر ومتنسوش ان الهجره من مكه للمدينه كانت مدتها 14 يوم .. فأراد الله ان النبى يدخل على اهل المدينه (الأنصار) فى هيئه جميله و مشرفه ..

فيروح الزبير و يجيب ثلاث عبايات بيض جداد و ايه مستوردين من الشام .. ولبسوا الهدوم و كملوا فى طريقهم للمدينه.. وفى موقف حصل لازم تعرفوه و النبى مهاجر فى الطريق ..فوجئ برجل اسمه بُرَيْدَة بن الحصيب زعيم قبيلة اسمها "أسلم"،  خرج و معاه سبعين من قومه عايز يمسك  برسول الله صلى الله عليه وسلم وأصحابه عشان ياخد المكافأة الكبيرة، ولكن النبى صلى الله عليه وسلم وقف و عرض عليهم الإسلام في هدوء وسكينة، فوقعت كلمات الله رب العزه فى قلب بُرَيْدَة و قلب أصحابه وآمنوا كلهم في لحظة واحدة، .كانوا في أول اليوم من المشركين وبقوا في آخره من الصحابة، شايفين فضل ربنا العظيم عليهم وعلى الدعوة، ده كان عشان النبى يدعوا حد للإسلام كانت قريش تقف له عشان بس يدعوا لواحد بس.. 

لكن دلوقتى اسلم عدد كبير على يد رسول الله و فى لحظه واحده.. الحمدلله.طيب إيه أخبار الصحابه اللى اتحركوا قبل النبى للهجره من مكه للمدينه؟و الصحابه تعبانين مش بيناموا و لا قادرين ياكلوا و لا يشربوا من شدة القلق على النبى لأن الطريق من مكه للمدينه ياخد أربع ايام بس لكن دلوقتى عدى 14 يوم..وكل يوم يقفوا يستنوا النبى على باب المدينة لحد اليوم العاشر لحد ما جه  عليّ بن ابى طالب ..تخيلوا !! 

عليّ هاجر بعد النبى و هاجر ازاى عليّ ؟ هاجر ماشى  على رجله. اصل كفار قريش اخدوا الناقه بتاعته و ومرضيش يرجع لمكه.. لانه خاف يتأخر عن رسول الله :') ♡  كل اللى مسيطر  عليه دلوقتى هو انه يشوف النبى بعينيه..فيقول عليّ : واصلت الليل بالنهار فكنت اركض  وأجرى واسقط وأنام وأقوم وأجرى واسقط حتى وصلت إلى المدينة فقلت أين رسول الله فقالوا: لا ندرى فبدأت الناس والنساء بيبكوا ويقولوا مات رسول الله .. قتل رسول الله ..
الصحابه "المهاجرين من مكه للمدينه"و اهل المدينه" الأنصار" فى حزن شديد و بكاء ..قلقانين على رسول الله لأنه أتأخر اوى فى الطريق.. و فى اليوم ال14 الرسول عليه الصلاه و السلام بدأ يقرب للمدينه و وصل لمكان أسمه الثنيه .. فكان فى واحد من اهل المدينه  طالع على نخله بيشوف القوافل بتاعت التجاره وصلت والا لأ ..فيقدر ربنا انه يشوف رسول الله .. فالراجل ده بيحكى و بيقول: رأيت ثلاث يمشون فى السراب ويلبسون البياض فناديت يا معشر العرب جاء  الذى تنتظرون..جاء الذى تنتظرون.. 

وبيحكى و بيقول  فرتجف بدنى "( اترعش اوى) وسقطت على الأرض.. و اول ما الناس عرفت خبر مجئ رسول الله .. عليت اصوات التكبير .. الله اكبر .. الله اكبر.. و الأرض بقت تترج من صوت الناس ..اللى بيضحك واللى بيبكى و الكل بيقول جاء رسول الله..جاء رسول الله ..يا بختهم ♡ :') اللهم صل على الحبيب..ويقول واحد من أحبار اليهود (رجل دين يهودى) اسمه عبد الله بن سلام : والله إن رأيته لعرفته ( اصل اليهود عندهم وصف رسول الله فى كتابهم) فقام عبد الله و جرى عشان يشوف النبى على ابواب المدينه..فبمجرد انه شاف رسول الله و نظر فى وجهه ..قام قايل : أشهد ان لا اله الا الله وأنك رسول الله ..

وأشرقت  المدينة بقدوم رسول الله ..و الناس فرحانه ان النبى واقف قدامهم و بدأو ينشدوا الشعر .. أنس بن مالك  بيقول( وده حيبقى خادم رسول الله   صلى الله عليه وسلم) : دخل الرسول المدينة يوم الاثنين فأنار منها كل شيء ومات يوم الاثنين فأظلم منها كل شيء :') ♡ ..و يدخل النبى المدينه و يوصل لمكان اسمه قباء وكل الصحابه يتلموا حواليه وبدأ النبى بالكلام  وكانت اول كلمات للنبى ..قال صلى الله عليه و سلم : أيها الناس افشوا السلام ،واطعموا الطعام ،وصلوا بالليل والناس نيام ،تدخلوا الجنة بسلام " دول 3 جمل ،كلام سياسى اجتماعى ودينى ...، 

عامل سياسى : افشوا السلام حتتوقف الحروب ..،واطعموا الطعام : وده عامل اجتماعى عشان ميكنش فى فقر فى المجتمع، وصلوا بالليل .. وده عامل دينى روحانى .. و ينهى كلامه النهاية  بعامل تحفيزى و وعد من الله سبحانه وتعالى بالجنة.. فلا يوجد قائد فى العالم يأتى بكل هذه العناصر فى جمله الا محمد عليه الصلاه و السلام..اللهم صل و سلم و بارك على من أوتى جوامع الكلم ♡..طيب ايه أول عمل حيقوم به النبى صَلِّى الله عليه وسلم؟ 

 بناء مسجد .. طيب يا سيدنا النبى ..حضرتك بقالك 14 يوم لا نوم كويس ولا راحه و ارض صعبه و طريق متكسر واكل قليل و تقرر تبنى مسجد؟ تعبت كتيييير اوى عشانا يا رسول الله :') ..  اصل المسجد يا جماعه ده أساس المجتمع الإسلامى.. و ده حيبقى مسجد قباء اللى ربنا عز وجل قال عنه : " لَّمَسْجِدٌ أُسِّسَ عَلَى التَّقْوَىٰ مِنْ أَوَّلِ يَوْمٍ أَحَقُّ أَن تَقُومَ فِيهِ فِيهِ رِجَالٌ يُحِبُّونَ أَن يَتَطَهَّرُوا وَاللَّهُ يُحِبُّ الْمُطَّهِّرِين " و قال صلى الله عليه و سلم : من توضأ فى بيته وأتى قباء فصلى به ركعتان كانت له عمرة تامه تامه تامه.. ويبدأ  الرسول فى بناء المسجد النبوى..

فيمسك  النبى بأول طوبه والصحابة يبدأو يقلدوه .. اصل النبى عايز يرسخ مبدأ انى القائد اه لكن إيدى بإيدكم فى بناء المجتمع و أنى مش قائد متكبر ..لأ.. انا متواضع مثلى مثلكم وهذا نهج و طريق النبى حتى وفاته صَلِّى الله عليه وسلم ..فالصحابه يقولوله.ألا تستريح يا رسول الله؟ فيقول لهم دعونى أعمل ولكن اعملوا مثلى ..فيحمل ابو بكر طوبه ثم عمر بن الخطاب ثم عثمان فيقول النبى : هؤلاء أولات الأمر من بعدى و فعلا دول الخلفاء الراشدين بترتيبهم من بعد وفاته صلى الله عليه و سلم .. 

و يجى عمار بن ياسر( فكرينه..اللى اتعذب جامد ..و أمه سميه اللى عذبها ابو جهل و قتلها عشان اسلمت ) و يجى عمار عايز يفرح النبى عليه الصلاه و السلام.. فيشيل طوبتين فى مره واحده.. فيضحك النبى .. ( يااا شايفين جمال الفرج بعد الصبر و الثبات على طاعه الله و على دين الله .. قال تعالى : سَيَجْعَلُ اللَّهُ بَعْدَ عُسْرٍ يُسْرًا ♡ سبحان الله ) 

و الصحابه فرحانين فيبدأو يقولوا شعر عشان يحمسوا نفسهم .. فيقولوا بيت شعر جميل أوى.." لأن قعدنا والرسول يعمل ما ذاك منا إلا العمل المضلل ) ويرددوا البيت.. فيرد النبى عليه الصلاة والسلام ويقول " اللهم لا عيش إلا عيش الآخرة فأرحم الأنصار و المهاجرة".. (يقصد بالانصار اهل المدينه.. و بالمهاجره يقصد الصحابه اللى هاجروا من مكه ♡ )
طب إيه اللي هيحصل بعد كده ده اللي هنعرفوا مع بعض الحلقة القادمة بإذن الله)