سيرة سيدنا النبى صلى الله عليه وسلم (الحلقة 37)

الحلقة ( 37 )
يلا صلوا على النبى :)
تلخيص غزوه بدر <3

عشان نقدر نستوعب الغزوات سوا.. فأحنا هنتفق مع بعض أننا حننزل بوست يبقى فيها تفاصيل كل غزوه فى نقاط مختصره و كمان اسبابها ..  و بعدين حننزل يوميآ بتفاصيل الغزوه كلها على حلقات بإذن الله♡
-------------------------------- غزوة_بدر
1- سميت بهذا الأسم: عشان موقع الغزوة كان عند بئر اسمه بدر.و يوم غزوة بدر ربنا عز وجل سماه فى القرآن ب " يوم الفرقان " طب ليه؟ عشان احداث يوم بدر فرّقت بين ان الدوله الإسلاميه فى نظر العرب من دوله ضعيفه و فقيره و مهدده من باقى القبائل لدوله قويه ليها إعتبارها و كيانها..
2- طرفي القتال : حوالى 1000 من قريش خارجين من مكه ب1000 ناقه و 200 فرس يعنى الجيش كله راكب اما الطرف التانى حوالى 313 من المسلمين مع رسول الله خارجين من المدينه ب70 ناقه فقط و حيركب الصحابه  و رسول الله علي النوق دى بالتناوب و كل واحد حيمشى شويه

 أسباب الغزوه :
 **تهديد قريش لفظيآ للمسلمين بإرسال جواب تهديد بقتال المسلمين و رد رسول الله على الخطاب و قال انه لا يريد الحرب و لكن يريد ان يخلو بينه و بين الناس (يعنى ميقفوش فى طريق دعوه الناس للإسلام) لكن ردت قريش على النبى و قالت انها مش حتسيب النبى و لا اصحابه حتى بعد هجرتهم من مكه

** أعتدت قريش بالفعل على المسلمين بعتت قريش سريه  هجمت عليهم بالليل (فبقت حياه رسول الله و دعوته للإسلام فى خطر شديد).. رغم ان قريش اجبرت المسلمين انهم يسيبوا بيوتهم  و اموالهم فى مكه و هاجروا الصحابه من التعذيب الشديد و محاولات قتل لرسول الله و رغم كل ده رايحيين ورا المسلمين بردو عشان يعتدوا عليهم..

**خروج المسلمين فى سريه عند منطقه اسمها النخله لرصد حركه كفار قريش ("سريه مخباراتيه" و النبى عليه الصلاه و السلام امرها بالخروج للرصد فقط و لكن مش للقتال رغم ان قريش بادئه العدوان .. و لكن الرسول عليه الصلاه و السلام كان حريص ان ميحصلش قتال و الدليل انه امر السريه بالخروج فى الأشهر الحرم "التى حرم الله تعالى فيها القتال")

 الأحداث المترتبه على ذلك :
رصدت الإستخبارات ان فى قافله تجاريه تبع قريش كانت فى طريق رجوعها من الشام لمكه بقيادة" أبى سفيان بن حرب " و كانت كبيره و فيها ألف بعير (ناقه)  و عليها فلوس كتير جدآ والمخابرات اللى  تبع المسلمين عرفت ان القافله تاجرن بأملاك و اموال المسلمين اللى اتعذبوا و اجبرتهم قريش على الهجره من مكه بسبب إسلامهم لدين الخير و السلام و الاخلاق و الوفاء يحرم الزنى و القمار و بيحقق مساواه بين العبد و السيد ..

** تحرك المسلمين لإستراد اموالهم فقط ( اموال المسلمين و شقاهم و حقهم و مش ينفع يسيبوه.. والله لا يستحيي من الحق )

*يوصل خبر لأبى سفيان ان المسلمين هييجوا ياخدوا اموالهم ..فيطلب مدد من مكه لأنه فكر انه حيواجه قتال.. فيبعت واحد اسمه ضمضم  لمكه عشان يبلغهم.. و لكن ضمضم  الخبيث قام جارح الناقه و اخد دمها و حطه على وشه و لبسه و نعكش شعره و يدخل ضمضم مكه و يدعى ان المسلمين هجموا لقتال ابى سفيان .. وده كدب طبعا..

** تسمع قريش الكلام ده فيحرضهم ابو جهل بتجهيز جيش مقاتل و متجهز بكل ادوات الحرب من 1000 جندى.. و حاول واحد من المشركين بإقناع قريش انهم ميحاربوش محمد عليه الصلاه و السلام لان محمد مش عايز حرب و كل طلبات محمد عليه الصلاه و السلام انهم يخلو بينه و ببن الناس و يسيبوه ينشر دين الله عز وجل و من شاء فليؤمن و من شاء فليكفر لكن ابو جهل اصر على الحرب و منع دعوه رسول الله لدين الإسلام و استمر فى تحريضه للحرب..

** عرف النبي عليه الصلاه و السلام ان قريش جهزت جيش و هدفها القتال و الصحابه اتخضوا جدااا لكن المسلمين بقوا مضطرين لمواجهه الجيش ده ..حيتقابل الجيشين فى نص الطريق عند بئر بدر، هيعسكر النبى فى مكان اسمه العدوة الدنيا .. وقريش هتخرج من مكة وتعسكر في مكان اسمه العدوة القصوى( "العدوه" ده تل..جبل صغير).

**هتبدا المعركه بالمبارزة  .. حيطلع تلاتة من كفار قريش "عتبة بن ربيعة" "شيبة بن ربيعة" "الوليد بن عتبة" .. ( عتبة وابنه واخوه ) و يقولوا : يا محمد أخرج لنا ثلاث من مهاجرى قريش نبارزهم.. فيخرج 3 من صحابه رسول الله "حمزة بن عبد المطلب" .."علي بن ابي طالب".. "ابو عبيدة بن الحارث بن عبد المطلب" حيتقتل الصحابى الجليل ابو عبيده ابن الحارث و حيشتد القتال و حتستمر المعركه بين حوالى 1000 قرشى و حوالى 313 مسلم
 نهايه المعركه:
حتقضل المعركة مستمرة وجيشهم كبير جدا وجيش المسلمين بقى تعبان فيقف النبي علي التل ويدعي ربنا  و يرفع إيده و يقول: اللهم انصرنا .. اللهم انجزني وعدك ..حتي يسقط رداءه من علي كتفيه الشريف..  فجري ابو بكر واخد الرداء وحطه علي ظهر النبي وحضن النبي صلي الله عليه وسلم  و قاله هون عليك يا رسول الله..و اول ما النبي خلص الدعاء تنزلت الملائكة استجابة الي دعاء رسول الله هتتنزل الملائكة وهتحارب و حيشوفها الصحابة عياناً بياناً في ارض المعركة و ينتصر المسلمين ♡