سيرة سيدنا محمد صلى الله عليه وسلم (الحلقة 63)

يلا صلوا على النبى :)
تلخيص غزوة الأحزاب أو الخندق 

عشان نقدر نستوعب الغزوات سوا.. فأحنا اتفقنا أننا حننزل بوست يبقى فيها تفاصيل كل غزوه فى نقاط مختصره و كمان اسبابها ..  و بعدين حننزل يوميآ بتفاصيل الغزوه كلها على حلقات بإذن الله

1- سميت بأسم غزوه الاحزاب لأن فيها اتجمع كل حزب من احزاب الكفار واتفقوا على محاربه المسلمين.. و سميت ايضآ بغزوة الخندق لان قام المسلمين بحفر خندق يصد العدوان من شمال المدينه و كانت خطه لم يعتاد عليها العرب فهى خطه فارسيه

2- طرفي القتال :الطرف الأول... اتحاد الكفار من قبائل مختلفه منها (قريش / غطفان / بنى سليم /أشجع) و عددهم 10，000 مقاتل
و الطرف التانى..المسلمين قى المدينه و عددهم 3000 جندى

3- أسباب الغزوه :
بعد محاولات الكفار فى الإعتداء على المدينه من بعض القبائل و هزيمتهم على ايد جيش المسلمين.. الكفار بدأوا يلاحظوا إن كل قبيله منهم لو بتحارب النبى لوحدها مش حتقدر تنتصر عليه و على جيش المسلمين..فقرروا يتحدوا ضد المسلمين

4- أحداث الغزوه:
**بادر حيي بن أخطب قائد مستوطنه اليهود فى خيبر بإنه يجمع الكفار لمحاربه سيدنا محمد ﷺو بدأ يعرض الفكره على كل قبيله و كلهم وافقوا على الإتحاد ضد سيدنا محمد ﷺ

**علم النبى عليه الصلاه و السلام ان الكفار بيستعدوا للإعتداء على المدينه فأخذ بمشوره المسلمين و كان فى صحابى اسمه سلمان الفارسى اقترح فكره حفر الخندق لحمايه المدينه من الشمال (لأن ربنا انعم على المدينه بحصون طبيعيه و تضاريس تحميها من الشرق و الغرب و الجنوب) و تم ايضآ عمل حصن لحمايه النساء و الأطفال جوه المدينه

** اتفاجئ الكفار بالخندق و قرروا يفكروا فى حل لدخول المدينه فقرروا يتفقوا مع يهود بنى قريظه و يحاولوا يقنعوهم بأنهم ينقضوا العهد بينهم و بين رسول الله (بنى قريظه عايشين فى جنوب المدينه و بينهم و بين رسول الله معاهده سلام)

** نقض اليهود العهد و كانت نكبه كبيره فى وسط الغزوه و حاول اليهود فى التخطيط للهجوم على نساء و اطفال المسلمين .

** انعم الله على المسلمين بإسلام نعيم بن مسعود فراح للنبى و قال الشهاده ♡ .. فالنبى قال له يحاول يصد العدوان عن المسلمين و ان الحرب خدعه (يعنى يخفى إسلامه و يحاول يكون وسط الكفار و يعمل اى شئ يصد العدوان)

** استطاع نعيم انه يفكك جيش الأحزاب و يوقع بينهم و بين يهود بنى قريظه بطريقه فى منتهى الذكاء

** ارسل الله تعالى الرياح على جيش الكفار فكانت تقتلع خيامهم

** قررت بعض القوى فى جيش الأحزاب انها تنسحب بعد حصار طويل على المسلمين و بكده اتفكك جيش الكفار

** نصر الله تعالى المسلمين و كفاهم القتال فبدأ جيش المسلمين فى وضع السلاح..فنزل جبريل على رسول الله يقول : ان الملائكه لم تضع أسلحتها بعد ،" بنو قريظه غدرت إن الله لا يحب الخائنين" فيروح النبى لجيش المسلمين و يأمرهم بقتال بنى قريظه بعد غدرهم بالمسلمين و يتم حصار بنى قريظه لحد ما حيستسلموا ..