سيرة النبى سيدنا محمد صلى الله عليه وسلم(الحلقة الرابعة)

الحلقة الرابعة
يلا بينا صلو على النبى 
وقفنا امبارح مع حليمه مرضعه النبى عليه الصلاه والسلام 
وهيه مش عارفه ليه محمدﷺ
رفض يكمل رضعته ..عارفين ليه ؟
عشان أخوه يرضع :') ..
أصل حليمه كان ليها ابن و ده هيبقى أخو النبى ﷺ فى الرضاعه..وحليمه بتقول: أنا مكنتش فاهمه ليه محمدﷺ دور وشه ومش راضى يكمل رضعته.. فحطيت النبى ﷺ و خدت إبنى وضميته لصدرى عشان يرضع .. فلما رضع إبنى ..خدت محمد ﷺبعديه عشان يرضع تانى..
فلاقيته رضى  فحبيته أوى أوى لأنه مرضيش يكمل رضعته غير بعد ما يرضع أخوه ..
وبعد كده حليمه قالت لزوجها: جرب شوف فى لبن فى الناقه بتاعتنا والا لأ.. فقال لها : يا حليمه انتى عارفه انها مفيهاش لبن.. قالتله : جرب ممكن تلاقى ولو حبه نقط..
فلما راح لاقى فى لبن فى الناقه وفضل يحلب الناقه لحد ما اتملا كل الطبق بلبن كتير اوى .. و راح لحليمه مش مصدق نفسه ..إيه ده! ..إزاى ده بيحصل يا حليمه؟ قالت له مش عارفه .. لعل ربنا أدانا نسمه مباركه ..رضيع عبد المطلب ده مش عادى..
وبتقول حليمه : شربت لبن وشرب زوجى وشبع محمد ﷺوأبنى كمان... ونمنا مرتاحين اوى
و والله ما كنا بنقدر ننام قبل كده من الجوع ومن عياط ابنى بسبب شده الجوع.
مواقف كتيره بتحصل عجيبه بتلاحظها مرضعه النبىﷺ ومش بس هيه ..لأ ..صحابها كمان ..
حليمه مرضعه النبىﷺبتقول قضينا يوم فى مكه وصحينا الصبح عشان نرجع لبنى سعد بالأطفال الرضع.
فركبت على الحمار بتاعى..فلاقيت الحمار بيجرى بيجرى وبيسابق نوق اصحابى ..فقالولى : حليمه ايه ده .. مش ده نفس الحمار اللى جيتى بيه لمكه؟ فقالت ايوه.. قالولها : مش ممكن .. اكيد بتكذبى.. ده كان بطئ جدا ومش قادر يمشى ..حتى وصلتى بعدينا..وكنتى آخر واحده!!
قالت: لأ ..دى هيه لكنى احمل عليها رضيع مبارك ♡..
والحمدلله وصلوا لبنى سعد وتقول حليمه كنت بحب محمد ﷺأويييي .. وكان بيكبر فى اليوم الواحد قد اللى بيكبره اى طفل فى شهر ويكبر فى الشهر قد اللى اى طفل بيكبره فى سنه.. فكان بيكبر بسرعه أوى
وحليمه لاحظت ده رغم أن اصلا العرب كانوا بيكبروا بسرعه فى الباديه ..ومعروف أن جو الصحرا بيساعد على ده لكن النبى عليه الصلاه والسلام كان برده دايما مختلف عن الأطفال التانيين..
و بتقول حليمه كنت انا وزوجى بنحب محمدﷺأكتر من أبننا♡
ومن شده حب حليمه للنبىﷺ
كان لما يروحلها ويقولها يا أمى ممكن اخرج ألعب بره الخيمه زى اخويا..فتقوله لأ معلش بلاش .. خليك جنبى أنا بخاف عليك اوى.. فيسكت محمدﷺ
ويسمع الكلام رغم ان نفسه يلعب :') .. و مرت الأيام وخلصت السنتين ولازم حليمه تفطم محمدﷺ
وترجعه لأمه ..لكنها كانت بتحبه اوى وعيزاه يفضل عندها كمان شويه ..
ياترى هترجعه لأمه بسهوله وللا هتفكر فى فكره؟؟؟؟
 ..كانت حليمه مهمومه أوي من كتر الزعل 
وبتقول شلت محمد ﷺ و فضلت أعيط متواصل من بنى سعد لحد مكه وكنت مهمومه هم محدش يقدر يتخيله. وفضلت افكر فى حجه وكلام اقوله لآمنه أم النبى ﷺ عشان ترضى تسيبهولى شويه كمان..
فأول ما دخلت عليها قلتلها يا آمنه ايه ده انتى لسه تعبانه.. وشك اصفر كده ليه.. ولسه فى مكه وباء كمان..لا لا. متخديش محمد ﷺ D: سيبيه عندى شويه .ردت آمنه وقالت: بس السنتين خلصوا..فقالت حليمه :بس انتى لسه تعبانه اهوه.. لسه..فقالت آمنه : لا لا هاتى محمد انا كويسه ..
قالت حليمه : لا ابدا شكلك تعبان اوى D: ..
و فضلت حليمه ورا آمنه لحد ما وافقت و أقتنعت أنها لسه تعبانه وفعلا رضيت انها تسيب محمد لحليمه .. وبتقول حليمه: فرحت أوي وحضنته ورجعت بيه لبنى سعد ومكنش حد فرحان فى الدنيا قدى أنا و زوجى ..
ومرت أيام راح محمد عليه الصلاه والسلام لحليمه وقال يا أمى ممكن اخرج ألعب؟ فقالت ماشى لكن خلى بالك على نفسك فخرج يلعب ومعاه اخوه من الرضاعه 
و محمد ﷺ بيلعب مع أخوه ..صرخ أخوه جااامد أوى وجرى وراح لأمه حليمه وقال :.........
يا أمى ألحقى محمد  ...
محمد أتقتل.. طب ليه ..ايه اللى حصل؟ 
"حادثه شق الصدر"
اصل محمد ﷺ لما خرج مع أخوه من الرضاعه عشان يلعبوا.. فجأه وهمه بيلعبوا قال النبى ﷺ لاقيت رجلين لابسين أبيض فى أبيض كأنهم نسرين فقربوا منى ومسكونى من لبسى ونيمونى على الأرض ... وقال واحد منهم للتانى : هوه ده ؟ فرد التانى عليه وقال : أيوه هوه ده .. 
طب مين الأتنين دول ؟ دول ملايكه ♡ .
وبعدين راح واحد منهم قايل للتانى : هات سكينه .. فبيحكى النبى ﷺ وبيقول : ففتحوا صدرى بالسكينه لحد السره و طلعوا قلبى وغسلوه فى طبق كبير من ذهب بماء ثلج و برد.. وبعدين طلعوا حاجتين صغيرين من قلبى لونهم أسود و رموها وقالوا :
ده نصيب الشيطان منك .. وبعدين رجعوا قلبى مكانه...و واحد منهم راح قايل للتانى : يلا خيط الجرح.
على فكره النبىﷺ لحد ما مات فضلت الخياطه معلمه فى جسمه الشريف ♡.. وكأنها عمليه قلب مفتوح عملتها الملايكه.
طب ليه حصلت حادثه شق الصدر؟.. 
الله عز وجل قال: إنَّا سَنُلْقِي عَلَيْكَ قَوْلًا ثَقِيلًا.والنبىﷺ بشر... وأى قلب بشرى طبيعى مش ممكن يقدر يتحمل القرآن ..كلام الله..ينزل عليه ..قال تعالى :
لَوْ أَنزَلْنَا هَٰذَا الْقُرْآنَ عَلَىٰ جَبَلٍ لَّرَأَيْتَهُ خَاشِعًا مُّتَصَدِّعًا مِّنْ خَشْيَةِ اللَّهِ وَتِلْكَ الْأَمْثَالُ نَضْرِبُهَا لِلنَّاسِ لَعَلَّهُمْ يَتَفَكَّرُونَ
عشان كده كان لازم القلب ده يتعالج معالجه إلهيه عشان يقدر يتحمل الوحى اللى هينزل عليه بعد 38 سنه ..فكان لازم عنايه إلهيه ..
طب النبى ﷺازاى مامتش ؟ لأن دى كانت معجزه والله على كل شئ قدير .. 
وبعد ما الملايكه خيطت صدر النبى ﷺ حصل إيه؟